Capgemini y l'Universidá d'Uviéu roblaron esta mañana'l Protocolu d'Intenciones para la creación de la Cátedra de Tresformamientu Dixital Sostenible, al traviés de la que dambes organizaciones van reforzar el so compromisu para alliniar la formación de los estudiantes a les necesidaes del mercáu llaboral, y van favorecer la cultura de la innovación, la investigación y la divulgación. El documentu foi suscritu pol rector de la Universidá d'Uviéu, Ignacio Villaverde, y el conseyeru delegáu de Capgemini España, Luis Abá,

 

La cátedra va realizar diverses actividaes formatives, d'investigación y divulgación, que van tener por oxetivu final llograr proyectos para'l tresformamientu dixital sostenible nos ámbitos rexonal, nacional, européu o internacional. Amás, la cátedra va apurrir un eleváu componente prácticu a esta formación, yá que va llevar a cabu diverses sesiones informatives, cursos y xornaes que sirvan para potenciar la cooperación educativa y les competencies en Ciencia, Tecnoloxía, Inxeniería, Artes y Matemátiques (STEAM), especialmente para les neñes. Per otra parte, va premiar proyectos de grau y máster o tesis doctorales, que presenten soluciones qu'ayuden a la Sostenibilidá Medioambiental o va desenvolver otres iniciatives como llaboratorios d'innovación, seminarios d'especialización, visites a los centros d'excelencia de Capgemini y xornaes de puertes abiertes. Con esta iniciativa, dase un fuerte impulsu a la cultura de la innovación y divulgación, yá que se va potenciar la participación del alumnáu de la Universidá d'Uviéu en convocatories de premios y hackathons que dexen resolver retos empobinaos a atopar soluciones para'l Tresformamientu Dixital Sostenible.

 

"Tamos arguyosos de roblar esti protocolu d'intenciones que refuerza'l nuesu papel como un dinamizador importante del ecosistema universidá-empresa nel Principáu d'Asturies. Esto representa non solo una evidencia del nuesu apueste incondicional pol talentu, sinón tamién del nuesu enfotu en convertir la innovación nun vector de tresformamientu clave ya imprescindible na formación d'esti talentu", afirma Luis Abá, conseyeru delegáu de Capgemini España.

 

El rector de la Universidá d'Uviéu, pela so parte, estimó a la empresa'l so apueste pola formación y fixo fincapié na importancia de que "les empreses cunten cola institución y col texíu científico ya innovador que podemos apurrir". "Ye vital desenvolver esti venceyu ente universidá y empresa, y más nesti campu nel que resulta vital conocer de primera esquito les necesidaes que surden nel ámbitu llaboral pa poder avanzar pel bon camín nel campu académico ya investigador", dixo.

 

Al actu tamién asistieron Javier del Lama, vicepresidente y director d'operaciones de Capgemini; Juan Luis Lara, director del centru d'Asturies; Secundino González, delegáu del rector pal Tresformamientu Dixital; Jorge García García, director d'área de Tresferencia y Cátedres d'Empresa y Benjamín López Pérez, profesor del Departamentu d'Informática.