Abandonar el tabacu y prevenir una ganancia de pesu escesiva simultáneamente resulta vidable. Asina lo revela un estudiu realizáu pola Universidá d'Uviéu ente persones con obesidá o sobrepesu que se beneficiaron d'un tratamientu psicolóxicu. El trabayu, lideráu por una investigadora de la Unidá Clínica de Conductes Adictives de la institución asturiana, acaba de ser publicáu na revista Drug and Alcohol Dependence, de máximu impactu na so área de conocencia. 

 

L'oxetivu principal del estudiu consistió n'evaluar la viabilidá del tratamientu, el prestu de los participantes y l'eficacia preliminar nel abandonu tabáquico y control del pesu con un abordaxe psicolóxicu qu'incidió simultáneamente sobro dambes cuestiones en persones con sobrepesu y obesidá. Con esti propósitu, investigadores de la Unidá Clínica de Conductes Adictives de la Universidá d'Uviéu llevaron a cabu un ensayu clínicu aleatorizado pilotu ente setiembre de 2020 y febreru de 2021.  

 

L'estudiu incluyó a 41 adultos, con una edá media de 52,73 años, nun porcentaxe llixeramente cimeru de muyeres qu'homes, que fumaben siquier 10 pitos al día y teníen un índiz de masa corporal de 25 o superior, esto ye, que carecíen sobrepesu o obesidá. A tolos participantes ufiertóse-yos tratamientu cognitivu-conductual pa dexar de fumar y prevenir l'aumentu de pesu corporal a lo llargo d'ocho selmanes.  

 

Gloria García Fernández, profesora de la Facultá de Psicoloxía y xuna de les firmantes del trabayu, destaca que les resultancies amuesen la viabilidá d'esti tipu de programes pa persones con problemes de pesu corporal. Asina, 37 de los 41 participantes (90,24%) remataron el tratamientu y asistieron amás a casi la totalidá de les sesiones. La calificación media de prestu col tratamientu, nuna escala de 1 a 10, foi bien alta y llegó 9,73. Amás, 31 participantes (75,6%) llograron dexar de fumar y los que caltuvieron la cesación tabáquica aumentaron de pesu, pero solo llixeramente, yá que ganaron 1,25 kilogramos del so pesu corporal inicial al rematar el tratamientu. El trabayu apunta tamién que 17 de los 41 participantes recibieron un refuerzu positivu en forma d'incentivos pa llograr l'astinencia, que resultó de gran ayuda. 

 

"Esti estudiu apunta que'l programa de tratamientu resulta vidable, aceptable y amuesa eficacia preliminar pa dexar de fumar y prevenir un aumentu de pesu escesivu tres el cese tabáquico", comenta la investigadora. "Resulta amás un trabayu novedosu al dirixise a una población específica de riesgu y al encetar una de les barreres principales pa dexar de fumar, la medrana al aumentu de pesu", conclúi García Fernández.

 

Esti estudiu ye la primer publicación (revista JCR del primera cuartil) deriváu del proyectu d'investigación tituláu Tratamientu del tabaquismu en fumadores con obesidá (RTI2018-101465-A-I00) financiáu pol Ministeriu de Ciencia ya Innovación (MCI), l'Axencia Estatal d'Investigación (AEI) y el Fondu Européu de Desenvolvimientu Rexonal (FEDER).