Alumnos del IES Peñamayor de Nava, por un trabayu sobro la calidá del aire nel conceyu, y del IES nº 5 d'Avilés, por un estudiu sobro la intelixencia artificial aplicada a la clasificación fotográfica, alzáronse colos premios de la fase asturiana del concursu Incubadora de Sondeos y Esperimentos que convoca cada añu'l Departamentu d'Estadística ya Investigación Operativa y Didáctica de la Matemática de la Universidá d'Uviéu. 

 

El xuráu d'estos galardones decidió otorgar el premiu na so categoría B, destinada a 3º y 4º d'ESO y FP Básica, al trabayu tituláu La calidá del aire en Nava, presentáu pol IES Peñamayor. Los alumnos distinguíos, tutorizados pola profesora Cristina García García, son: Lucía Pruneda Canga, Unai Sánchez Lorenzo, Jairo Villa Ortega y Paola Suárez Carbayeda. 

 

Según los miembros del xuráu, nesti trabayu, el autores utilizaron la información recoyida en distintes estaciones meteorolóxiques del conceyu, ellaboraes por alumnos del centru mientres el cursu anterior, pa estudiar la incidencia de contaminantes como'l dióxidu de carbonu o'l dióxidu d'azufre na calidá del aire, tantu dientro del so centru d'estudios, como n'otros puntos del conceyu.

 

Na categoría C, dirixida a estudiantes de 1º y 2º de Bachilleratu y Ciclos Formativos de Grau Medio, el galardón recayó nel trabayu Sesgos nos algoritmos basaos en machine learning: casu d'estudiu sobro clasificación d'imaxes de distintos oficios, presentáu pol IES nº 5 d'Avilés. Los alumnos distinguíos, col profesor Daniel Sánchez Repullo como tutor, son Javier Blanco Sánchez. Adrián Mestes Bustamante, Aitor Pico García y Mateo Rama García.

 

Esti estudiu analiza cómo funciona'l procesu d'aprendizaxe d'una intelixencia artificial aplicada a la clasificación profesional d'individuos por imaxes fotográfiques. De primeres, los alumnos entrenaron la intelixencia artificial con una serie de imagen tipo nes qu'hai diversidá de races, sexos, ambientes de trabayu pa, darréu, utilizar esti aprendizaxe na clasificación d'un nuevu conxuntu d'imaxes y analizar les resultancies d'ésitu y fracasu llograos en cada casu.

 

Los grupos ganadores de caúna de les categoríes representen a Asturies na undécima convocatoria de la fase nacional del concursu, que, anguaño, tien llugar en Toledo, na que van competir con el ganadores de les distintes fases autonómiques.

 

El xuráu señaló que, a la de decidir el ganadores, tuviéronse en cuenta aspecto como la orixinalidá de la tema escoyida, la claridá na esposición d'oxetivos, fases del proyectu y resultancies, la correcta aplicación de les técniques estadístiques emplegaes, les conclusiones y analís críticu del proyectu, l'informe final y l'innovación na presentación de les resultancies.

 

El concursu Incubadora de Sondeos y Esperimentos ta destináu a premiar trabayos d'Estadística y d'Investigación Operativa realizaos por alumnáu de los cursos d'Enseñanza Secundaria Obligatoria (ESO), Bachilleratu, Formación Profesional Básica y Ciclos Formativos Profesionales de Grau Medio de los centros docentes del Principáu d'Asturies.

 

La finalidá d'esti concursu ye fomentar la enseñanza y aprendizaxe de la estadística nos niveles educativos non universitarios col enfotu de consiguir persones motivaes pa realizar estudios universitarios d'Estadística ya Investigación Operativa o, polo xeneral, pa familiarizase cola recoyida y analís de los datos que pueden atopar nel mundu que nos arrodia; según la posterior toma de decisiones n'interpretando la información estadística contenida nellos. El concursu tamién busca fomentar l'espíritu críticu nel alumnáu non universitario.