Convertir el Campus de Mieres nun referente universitariu nacional ya internacional. Este ye l'oxetivu espresáu esta tarde por Ignacio Villaverde, rector de la Universidá d'Uviéu, mientres l'actu de celebración del 20 aniversariu d'esti espaciu educativu. El rector anunció que la próxima seronda va presentase la estratexa para faer del Campus de Mieres non solo nun allugamientu emblemáticu para la formación y l'investigación, sinón tamién nuna exa tresformadora de la redolada.

 

El máximu responsable universitariu pronunció estes palabres mientres la conmemoración del 20 cumpleaños del campus. L'actu institucional, abiertu a la comunidá universitaria y a la sociedá asturiana, cuntó cola presencia, ente otres autoridaes, d'Ángel Martín, director de la Escuela Politécnica de Mieres, Aníbal Vázquez, alcalde d'esta localidá; y Adrián Barbón, presiente del Gobiernu d'Asturies. 

 

Villaverde tuvo palabres emocionaes escontra el rectores que-y precedieron y escontra el directores del campus mierense: Ángel Ramón Vidal Valdés de Miranda, Antonio Bernardo Sánchez, Celestino González Nicieza y Pedro José Farias Arquer, Asun Cámara y, na actualidá, Ángel Martín. "Gracies de corazón, porque, como siempres dixi, la Universidá d'Uviéu ye lo que ye poles persones que nella estudien, trabayen, investiguen, enseñen o xestionen", destacó. 

 

El rector recordó que los estudios con see nesti campus especializáronse na formación amestada a los recursos natural y medioambiental, la so ordenación y articulación territorial, los materiales y los sos nuevos usos y rendimientos, y el diseñu y construcción de grandes infraestructures civiles. "Esta progresiva singularización dexó que'l campus, en redol a la so Escuela Politécnica, tenga xuna ufierta formativa homoxénea y articulada, de bien alta calidá, perbién valorada y qu'atraxo y fomentó la creación de grupos d'investigación especializaos nesos ámbitos qu'algamaron yá abonda masa crítico pal siguiente saltu cualitativu", sorrayó.

 

"El campus tien que cuntar cuanto antes con una estratexa bien articulada y que lo lleve a convertise nun referente universitariu nacional ya internacional. Dicha estratexa debe visibilizar tantu la so realidá académica y científica como'l so potencial como hub tresformador de la so redolada. La próxima seronda vamos presentar yá les bases d'esta exa centrada nos recursos naturales y les materies primes, y nel que tien de tener presencia'l sector priváu, el Principáu y, poques gracies, la Universidá d'Uviéu, como impulsora y motor", añedió. 

 

Villaverde tuvo tamién una alcordanza especial pa otros organismos que, más allá de la Escuela Politécnica de Mieres, dan vida y nutren esti campus. "Dos grandes institutos, como'l Indurot, que yá cunta con más de 35 años de trayectoria, o l'Institutu Mistu d'Investigación en Biodiversidá, les cátedres equí presentes o aquellos grupos d'investigación que desenvuelven nestos edificios parte del so llabor. El futuru d'esti campus ta precisamente en esti treme. Xuntos vamos poder impulsalo y asitialo nel llugar que se merez", afirmó.

 

"Brillante pasáu y gran potencial futuru"

Pela so parte, el director de la Politécnica fixo fincapié nel brillante pasáu del campus, nel so presente y nun gran potencial de futuru". "Si miramos al futuru –comentó Ángel Martín-- queremos convertinos nun centru de referencia pa la sociedá asturiana tocantes a docencia, investigación y tresferencia de tecnoloxía a les empreses. Asina mesmu esta pretensión querer llevar a nivel nacional ya internacional, estableciendo contactos con distintes universidaes y centros d'investigación". "Tamién queremos que la Escuela Politécnica de Mieres tea abierta a tola sociedá asturiana, empezando por y dende Mieres y la redolada de les cuenques mineres, promoviendo un centru d'actividá cultural, innovación y participación ciudadana", añedió.

 

El director de la escuela nun s'escaeció de l'ambición investigadora que ta nel orixe del mesmu campus. "Suañamos cola creación d'un gran Centru d'Innovación Tecnolóxica nel Campus rellacionáu colos 4 graos y los 2 másteres universitarios esistentes na EPM, dende la óptica del analís esperimental". "La nuesa ambición y el nuesu compromisu nun s'acaba equí, pos nun momentu que'l mundu enfrenta desafíos tan críticos como'l cambéu climáticu, la guerra, l'aumentu de les desigualdaes socioeconómicas, la crisis enerxética o la perda de biodiversidá, tenemos la voluntá de que nuesa querida escuela y el nuesu campus sían partes y motores la vegada, de la tan necesaria transición n'ares de la sostenibilidá" aseguró.

 

Ángel Martín, que mentó los 17 Oxetivos de Desenvolvimientu Sostenible de Naciones Xuníes, manifestó que, conscientes de la necesidá d'esti cambéu per un mundu meyor, conscientes de la responsabilidá como centru universitariu y conscientes del rol que van xugar los futuros inxenieros ya inxenieres que tamos formando; güei, "queremos manifestar l'adhesión de la Escuela Politécnica de Mieres a l'Axenda 2030 de les Naciones Xuníes. Convertímonos asina nel primer centru universitariu d'Asturies, en comprometenos formalmente colos Oxetivos de Desenvolvimientu Sostenible". "Pa ello, vamos espublizar y vamos poner en valor el papel de les nueses inxenieríes na Axenda 2030 y, amás, vamos promover acciones d'investigación y tresferencia tecnolóxica nesta llínea. Xuntu con tou esto, vamos trabayar pa formar al nuesu alumnáu en materia de desenvolvimientu sostenible, actualizando y completando, cuando fuera necesariu, los programes formativos de les nueses titulaciones", concluyó.

 

L'actu de conmemoración, nel que se proxectaron fotografíes antigües del campus, cuntó amás coles intervenciones de Aníbal Vázquez, alcalde de Mieres, y d'Adrián Barbón, presidente del Principáu.