Los alumnos Nachu Rodríguez Fernández, del IES de La Ería d'Uviéu; Carla Hevia Arnáez, del IES Bernaldo de Quirós de Mieres, y Aitana Campillo Barreiro, del IES Fernández Vallín de Xixón, alzáronse, respectivamente, esti sábadu colos  trés primeros premios de la XV Miniolimpiada de Química d'Asturies 2022 que se desenvolvió na Facultá de Química de la Universidá d'Uviéu.

 

Participaron nestes pruebes 167 alumnos de 33 centros d'educación d'Asturies, públicos y privaos, que tuvieron acompañaos por 42 profesores. Esta alta participación foi posible gracies al equipu de profesores que s'esmolecen por dar una bona formación a los sos alumnos y espertar nellos l'interés pola ciencia. Dempués del exame, los participantes asistieron a una charra titulada "Escontra l'oxetivu de cero emisiones de CO2. Contribución del hidróxenu", impartida pol profesor José Manuel Fernández Llombes. 

 

A les 14:00 hores, tuvo llugar  la entrega de premios presidida pol vicerrector d'Investigación, Antonio Fueyo Silva, que tuvo acompañáu na mesa pol presidente de l'Asociación de Químicos del Principáu d'Asturies, Miguel Ferrero Fuertes; la decana de la Facultá de Química, Susana Fernández González; el vicedecano del Colexu de Químicos, Javier Santos Navia, y el vicepresidente de la Sección Territorial d'Asturies de la Real Sociedá Española de Química, Enrique Aguilar Huergo. La relación de premiaos puede consultase nel documentu axuntu.

La Miniolimpiada Química ta dirixida a los alumnos de 3º de la ESO, entamada pola Asociación de Químicos de Principáu d'Asturies, la Sección Territorial d'Asturies de la Real Sociedá Española de Química, el Colexu Oficial de Químicos d'Asturies y Llión, y la Facultá de Química de la Universidá d'Uviéu cola collaboración de la Conseyería d'Educación del Principáu d'Asturies y otres entidaes.