La Universidá d'Uviéu, enraigonada na sociedá asturiana y comprometida cola reconocencia y desenvolvimientu de la nuesa cultura y de la nuesa comunidá, desempeña un papel principal y relevante na promoción, el caltenimientu y l'espardimientu de la llingua asturiana, procurando asitiase al marxe de discutinios venceyaos a posiciones polítiques o personales, ayenes tanto a la nuesa responsabilidá institucional como a la naturaleza y característiques de la llingua mesma.

 

Consideramos oportuno señalar que los Estatutos de la Universidá d'Uviéu, nel so artículu sestu y nel apartáu relativu a la Universidá y Asturies, establez que:

 

1. La Universidá d'Uviéu, como universidá pública asturiana, va empobinar de manera relevante les sos actividaes a la realidá y l'ámbitu d'Asturies. 

2. La llingua asturiana va ser oxetu d'estudiu, enseñanza e investigación nos ámbitos que correspuendan. Coles mesmes, el so usu va tener el tratamientu qu'establezan l'Estatutu d'Autonomía y la lexislación complementaria, garantizándose la non discriminación de quien la emplegue. 

3. La Universidá d'Uviéu va promover, nel marcu de les sos competencies, les acciones que sían necesaries pa la normalización y desenvolvimientu de la llingua asturiana.

 

Acordies con esti mandatu estatutariu, consideróse preciso dir más allá del obligáu cumplimientu y asumir un papel activu y propositivu tomando como referencia la Llei 1/1998, de 23 de marzu, d'usu y promoción del bable asturianu.

Nesta llei, non solo s'establez como oxetu asegurar el llibre usu del asturianu y evitar la discriminación de les persones que lu empleguen, sinón que se conseña'l derechu a la so conocencia, el fomentu de la so recuperación y promoción, conforme a la garantía de la so enseñanza, considerando a la Universidá d'Uviéu'l muérganu consultivu competente na capacitación docente y la investigación llingüística y filolóxica.

 

Ye voluntá de la Universidá d'Uviéu siguir cumpliendo dafechu con estes responsabilidaes.

Les aportaciones de los distintos grupos de trabayu en docencia ya investigación, xunto cola collaboración con distintes entidaes y organizaciones comprometíes cola llingua y cultura asturianes, suponen un activu d'induldable valor que cuenta cola reconocencia y el sofitu de la Universidá por faer posible que toes estes xeres ya iniciatives tengan el mayor nivel d'ésitu y de repercusión, tanto nel ámbito académicu como nel social. 

 

El proyectu del equipu rectoral, como se recueye nel programa que cuntó cola mayoría del sofitu universitariu, parte del convencimientu de que la llingua y la cultura asturianes tienen de dexar de ser un motivu de tensión y conflictu. L'asturianu nun tien de ser entendíu como una "cuestión" y nun tenemos d'abonar una visión agónica y conflictiva de la llingua y de cultura asturiana dientro del senu de la universidá. 

 

L'asturianu, como llingua y bien académicu y cultural ye parte de la Universidá asturiana; pal cumplimientu cabal de los nuesos compromisos institucionales al respectu ye abondo tomar bien en serio el valiosu patrimoniu que representa, cumpliendo la llei como institución y alministración pública que somos y tamién sofitando y fomentando la so conocencia y la so valoración social por aciu d'una apuesta firme pola investigación y la docencia, d'alcuerdu cola naturaleza propia de una institución universitaria.