El solsticiu d'iviernu, momentu del añu nel que la escuridá de la nueche empieza a menguar pol aumentu constante de la lluz solar, desempeñó una importante función como marcador cultural y envernada na antigua Roma. Asina lo evidencian les resultancies llograes por un grupu d'investigadores españoles pertenecientes al Institutu de Ciencies del Patrimoniu (Incipit – CSIC), la Universidá de Santiago de Compostela y l'Universidá d'Uviéu, que fueron publicaos na revista Environmental Archaeology, de máximu impactu nesta área de la conocencia.

 

Yá yera sabíu que'l solsticiu d'iviernu modeló Roma y el so paisaxe dende'l cultu ancestral de Saturno como dios primordial del territoriu romanu antes de la fundación de la ciudá, hasta'l so usu per parte d'Augusto como unu de los signos de les sos múltiples conexones celestes y solares. Les fiestes importantes en redol al solsticiu yeren tamién bien conocíes. El investigadores d'esti estudiu propunxéronse demostrar cómo dellos monumentos públicos significativos, posiblemente de los oríxenes de Roma y de xuru del reináu d'Augusto, tán empobinaos escontra l'amanecer o l'atapecer del solsticiu d'iviernu. 

 

El trabayu, que cuntó cola participación del investigador David Espinosa, entós profesor del Departamentu d'Hestoria de la Universidá d'Uviéu y actual docente na Universidá Complutense de Madrid, refundió, siquier, trés conclusiones importantes. Primer, el protagonismu del solsticiu d'iviernu na orientación de distintos elementos de les ciudaes romanes, particularmente na dómina d'Augusto, establez un conxuntu de relaciones simbóliques de fondu interés y con implicaciones cosmolóxiques. Conecta a Augusto colos oríxenes de Roma, estableciéndolo como un nuevu fundador. Segunda, l'usu cultural de les asociaciones de Apolo col sol, bien establecíu pa Grecia, pero menos pa Roma, legitima el poder d'Augusto pa delles de les cultures más prominentes na parte oriental del Imperiu. Y tercer y última, el pimpanu desenvolvimientu urbanísticu de la parte occidental del Imperiu, col predominiu de la orientación del solsticiu d'iviernu, venceya estes localidaes con Augusto y, coles mesmes, con Roma.

 

El investigadores llegaron a estes conclusiones en realizando un estudiu arqueolóxicu, consistente na identificación de la orientación escontra la salida o la puesta del sol de dalgunos de los principales edificios públicos del antiguu foru romanu y el foru d'Augusto, lo mesmo que de otres ciudaes romanes d'Occidente. "El nuesu trabayu constató la elección del solsticiu d'iviernu como una fecha relevante del calendariu astronómico y relixoso romanu dotada d'una significación cultural venceyada colos ciclos de renovación de la naturaleza y de la ciudá de Roma", comenta'l profesor Espinosa.

 

Amás, l'estudiu dexó confirmar la esistencia d'una vinculación astronómico y topográfico ente la ciudá de Roma y los montes Albanos, llugar onde s'alcontraría la ciudá d'Alba Longa, patria de Rómulo y Remu, fundadores míticos de Roma. "L'emperador Augusto, continuador y impulsor d'esta llarga tradición, concebiría la so acción de gobiernu como una auténtica refundación de la ciudá de Roma, promoviendo la so identificación col dios solar Apolo y l'orientación escontra'l solsticiu d'iviernu de los edificios del so foru y de numberoses ciudaes romanes fundaes o reconstruyíes sol so mandatu", sorraya l'investigador.

 

El solsticiu d'iviernu revélase según un potente y estable marcador cultural que traviesa la hestoria de l'antigua Roma, venceya a Augusto colos oríxenes de la ciudá como una suerte de nuevu fundador -como yá se conocía por otres evidencies-, conectando les distintes ciudaes provinciales con Roma como parte d'una cosmovisión compartida.