La hemofilia, una enfermedá rara, discapacitante y caracterizada por sangraos articulares, afecta anguaño n'España a 2300 persones. El tratamientu farmacolóxicu d'esta patoloxía tuvo marcáu polos importantes meyores rexistraos na última década qu'ameyoraron la esperanza de vida d'estos pacientes. Sicasí, nengún estudiu valorara la eficacia de la fisioterapia na meyora de la calidá de vida percibida polos afectaos. Una investigación del Departamentu de Ciruxía y Especialidaes Médicu-Quirúrxiques de la Universidá d'Uviéu revela agora que la fisioterapia ye eficaz na meyora de la calidá de vida de los pacientes adultos con hemofilia.  L'estudiu, nel que participaron tamién, ente otros centros, la Universidá de Murcia y l'Universidá Católica San Antonio de Murcia, foi publicáu na revista Archives of Physical Medicine and Rehabilitation, de máximu impactu na área de la Rehabilitación.

 

L'investigador de la Universidá d'Uviéu Rubén Cuesta Barriuso destaca qu'esti estudiu enceta cómo les intervenciones de terapia manual pueden ameyorar l'estáu articular, el dolor crónicu y la calidá de vida de los pacientes con hemofilia. Esta patoloxía, considerada como minoritaria, afecta principalmente a los homes; les muyeres son portadores de la enfermedá. Ye un trestornu hemorráxicu hereditariu que s'anicia porque el sangre non se coagula de manera fayadiza. Les persones que la carecen presenten xuna falta o déficit total de dalgún de los factores del cuayamientu, lo que suel producir sangraos frecuentes en rodíes, todíos y coldos. La hemorraxa nes articulaciones provoca dolor y, cuando nun se trata, puede conducir a artritis dende les primeres décades de vida.

 

L'estudiu desenvueltu por Cuesta Barriuso, qu'amás d'investigador carez la enfermedá, demuestra qu'un protocolu de fisioterapia afechu espresamente a los afectaos d'hemofilia que sufren artropatía de coldu puede amenorgar el dolor y ameyorar la salú articular, lo que redunda nun beneficiu sobro la calidá de vida.

 

El investigadores llegaron a estes conclusiones en realizando un estudiu con 69 pacientes que fueron distribuyíos en dos grupos: unu que recibió la terapia y otru grupu de control. La edá media de los pacientes superaba llixeramente los 41 años. La mayoría de los afectaos carecíen hemofilia del tipu A, el 88% tenía amás un fenotipu grave de la enfermedá y tamién la mayoría d'ellos recibía tratamientu profilácticu con factores de cuayamientu. Los pacientes con hemofilia del grupu esperimental recibieron trés sesiones de 50 minutos con fisioterapia manual. El protocolu de tratamientu foi diseñáu específicamente pa pacientes adultos con artropatía hemofílica del coldu y ta disponible na web del grupu d'investigación (www.inhefis.com).

 

Rubén Cuesta Barriuso destaca que la importancia d'esta investigación, que define como pionera, mora en que "pudimos demostrar cómo la fisioterapia puede influyir na meyora calidable de vida, al traviés del control del dolor crónicu y otres variables invalidantes. El nuesu oficiu tien por oxetivu la meyora integral de los nuesos pacientes, dende los aspeutos musculoesqueléticos hasta'l desenvolvimientu de les actividaes de la vida diaria y los aspeutos psicosociales. Esti estudiu va nesa dirección, demostrando lo que nel ámbitu clínicu reparamos nos nuesos pacientes". El investigadores trabayen agora en nuevos estudios que dexen avanzar nel control del dolor que causa la enfermedá.

 

Referencia:

Rubén Cuesta-Barriuso, Javier Merono-Gallut, Elena Donoso-Ubeda, José Antonio López-Pina, Raúl Pérez-Llanes. Effect of a Fascial Therapy Treatment on Quality of Life in Patients With Hemophilic Elbow Arthropathy: A Randomized Controlled Trial. Archives of Physical Medicine and Rehabilitation.