El Claustru de la Universidá d'Uviéu axuntóse esta mañana, de forma telemática, n'una sesión na que se presentó l'informe de la defensoría universitaria y abrióse el sistema de votación para la elección de los representantes del Claustru nel Conseyu de Gobiernu. Mientres l'alcuentru, tamién se realizó al sortéu de los miembros de la Xunta Electoral Central y la designación de los integrantes de la Comisión de Reclamaciones. 

 

L'informe de la defensoría universitaria inclúi los datos de les actuaciones realizaes nel períodu entendíu ente'l 25 de payares de 2020 y el 30 de payares del 2021. El total de los casos atendíos fueron 231, lo que supon xuna vuelta a les cifres anteriores a la crisis sanitaria provocada pola Covid-19, que, col pasu de la universidá al funcionamientu non presencial, provocó un aumentu de les actuaciones de la defensoría, hasta llegar a 374 casos.

 

Por tipoloxíes, rexistráronse un total de 118 quexes, 105 consultes y 8 solicitúes de mediación. Los asuntos llegaron a la Defensoría principalmente por y-mail (156 casos), al traviés del formulariu disponible na web de la Defensoría (43 casos), per vía telefónica (22 casos), y n'escasu númberu al traviés d'entrevista (7) y escritu presentáu por Rexistru (3). Les actuaciones por colectivu guarden xuna relación col númberu de miembros que componen cada unu d'ellos, siendo, poro, les más numberoses les realizaes a instancia del estudiantáu. (Estudiantes: 190, PDI: 26, PAS: 6 y otros:9). 

 

Tocantes a la casuística, repitiéronse les temes que davezu lleven a los miembros de cada colectivu a solicitar la intervención de la defensoría, esto ye, evaluación y matricula ente l'estudiantáu; carrera profesional y procesos de selección, ente'l PDI y formación y provisión de places ente la PAS.

 

Elección de los representantes del claustru

 

Na xunta empecipióse la sesión de votación abierta pa la elección de los representantes del Claustru nel Conseyu de Gobiernu. Los miembros claustrales van poder votar hasta les 19 hores de güei, nun sistema novedosu que dexa estender l'horariu de votación. Presentáronse un total de 30 candidatures pa 20 places, cola siguiente distribución: 

 

- Colectivu A (PDI profesoráu doctor con vinculación permanente): 15 candidatures pa 9 places

- Colectivu B (PDI profesoráu perteneciente al restu de personal docente ya investigador): 5 candidatures pa 3 places

- Colectivu C (estudiantáu): 5 candidatures pa 5 places

- Colectivu D (PAS): 5 candidatures pa 3 places