La Universidá d'Uviéu participa na I Xornada Industria y Enerxía CZFB-FIE qu'enceta güei en Barcelona'l papel de la xestión enerxética de la industria énte'l procesu de transición ecolóxica. La xornada, entamada pol Consorci Barcelona Zona Franca y pol Foru Industria y Enerxía, cuenta cola participación del rector Ignacio Villaverde, y del profesor Eduardo Álvarez Álvarez, coordinador técnicu d'esti foru y profesor del Departamentu d'Enerxía de la Universidá d'Uviéu.

 

L'alcuentru acueye a representantes de la industria, la enerxía y les alministraciones públiques que van aldericar sobro les necesidaes enerxétiques de la industria y la contribución de les distintes tecnoloxíes al procesu de transición ecolóxica. La xornada pretende ser un puntu d'alcuentru nel que confluyan tolos actores implicaos na xestión enerxética de la industria: dende el productores d'enerxía a les industries consumidores pasando pola alministración, los fabricantes de tecnoloxíes y les instituciones académiques.

 

Na apertura de la xornada, el rector Ignacio Villaverde destacó'l papel de les universidaes, y más en concretu de la Universidá d'Uviéu, como factoríes de la conocencia qu'apurren investigación, desenvolvimientu, pero tamién innovación a la industria. "Les universidaes desempeñamos un papel crucial y contribuyimos cola nuesa aportación n'I+D+i a la meyora de la industria col propósitu final de crear sociedaes más riques y con mayor nivel de bienestar". Villaverde fixo fincapié na importancia de volver la mirada escontra la industria, n'ocasiones, asombrada y escaecida pel mundu dixital, estrechamente amestáu a la innovación. "Agora damos cuenta de que por qu'haya innovación tamién precisamos a la industria y, lóxicamente a les universidaes", manifestó. 

 

Mientres l'eventu, van tratase cuestiones como la coordinación ente los distintos ministerios, departamentos, y autoridaes autonómiques y municipales, lo que, como sorrayó Eduardo Álvarez, profesor de la Universidá d'Uviéu y director técnicu del Foru Industria y Enerxía, "ye un elementu fundamental pa la competitividá industrial". "La xestión enerxética ye xuna cuestión tresversal na que tán implicaos diversos ministerios y departamentos: ye necesariu escuchar la voz de toos pa tomar decisiones nel ámbitu enerxéticu", añede.

 

Coles mesmes, van plantegase cuestiones como les necesidaes concretes de distintos sectores industriales y el papel que pueden xugar les anovables, l'almacenamientu enerxéticu, la economía circular o la cogeneración d'alta eficiencia nel futuru desenvolvimientu industrial, en llínea colos oxetivos de descarbonización. Mientres l'eventu tamién se va aldericar el futuru y viabilidá del hidróxenu verde y van presentase dalgunes de les sos posibles aplicaciones a la xestión enerxética de la industria.

 

Nel alcuentru van participar representantes de les principales alministraciones públiques estatales, autonómiques y municipales; d'empreses enerxétiques y empreses industriales de distintos sectores como l'automovilísticu, alimentario y químicu; lo mesmo que de instituciones académiques.