La Universidá d'Uviéu inaugura en Mieres l'Institutu Mistu d'Investigación en Biodiversidá
El CSIC, la Universidá d'Uviéu y el Principáu d'Asturies presenten esti nuevu centru nel Campus de Mieres, qu'analizará les funciones y servicios de la biodiversidá y les sos amenaces | Los proyectos desarrollaos nel centru basaránse en dos llínees d'investigación: los servicios de la diversidá biolóxica y los impactos del cambiu climáticu
El Conseyu Superior d'Investigaciones Científiques (CSIC), la Universidá d'Uviéu y el Principáu d'Asturies inauguraron güei l'Institutu Mistu d'Investigación en Biodiversidá (IMIB-CSIC-UO-PA). El nuevu centru foi presentáu nun actu institucional, en Mieres (Asturies), cola presencia de la presidenta del CSIC, Rosa Menéndez; el conseyeru de Ciencia, Innovación y Universidá del Principáu d'Asturies, Borja Sánchez; y el rector de la Universidá d'Uviéu, Ignacio Villaverde. Al traviés del IMIB investigaráse cómo afecten los cambios ambientales provocaos poles actividaes humanes a la biodiversidá y los procesos ecosistémicos esenciales para la nuesa esistencia y bienestar.
Nel centru, que s'asitia nel campus de Mieres de la Universidá d'Uviéu, trabayen una trentena d'investigadores del CSIC y de la universidá, enantes venceyaos a la Unidá Mista d'Investigación en Biodiversidá (UMIB-CSIC-UO-PA). Cola creación del IMIB, el CSIC consolida la apuesta pola investigación n'Asturies al incorporar una nueva unidá a los trés centros yá esistentes nel Principáu: el Centru d'Investigación en Nanomateriales y Nanotecnología, l'Institutu de Ciencia y Tecnoloxía del Carbonu y l'Institutu de Productos Lácteos d'Asturies.
El ser humanu y la biodiversidá
El IMIB tomará dos llínies d'investigación. La primera dedicaráse al impactu del cambiu climáticu na biodiversidá sobremanera en poblaciones y especies típiques de climes fríos (alpines, ártiques); según la base evolutiva de la biodiversidá, el so orixe y distribución espacial. La segunda analizará les funciones ecolóxiques de la biodiversidá, el estatus de conservación de poblaciones monteses y especies amenazaes, l'impactu de les enfermedaes emerxentes y los procesos ecosistémicos nun escenariu de cambiu global.
La investigación nestes dos llínies realizaráse dende distintes aproximaciones: evolutiva, bioxeográfica, funcional, ecolóxica, y socioeconómica. De la mesma manera, los estudios desarrollaos considerarán tolos niveles de la organización biolóxica, dende la diversidá xenética a la ecosistémica; les distintes escales espaciales, de la continental a la local; y l'ámbitu temporal, de la era xeolóxica a la contemporánea.
Galería d'imaxes
