L' aumentu del costu de la enerxía, les normes no relativo a la estabilización del personal interino o'l plan antifraude foron dalgunes de les cuestiones que se trataron el pasáu vienres, 3 d'avientu na Comisión Sectorial de Xerencies del G-9 Universidaes, que se celebró de manera virtual. 

 

Sobre la midida del costu enerxéticu, tolos asistentes al alcuentru, convocáu pola presidencia del semestre a cargu del rector de la Universidá d'Uviéu, Ignacio Villaverde, coincidieron en señalalo como "una importante dificultá, coles sos continues xubides de preciu qu'en delles universidaes supunxeron un 133% d'aumentu de la partida presupuestaria pa 2022". Nesti sen, estudiáronse diverses soluciones loxístiques y operatives, según los problemes, yá resueltos pol contratu con G-9, que plantegaba dalguna suministradora.

 

Tamién s'estudiaron los problemes de la próxima normativa de estabilización del personal interín que ta  nel Senáu. Los participantes plantegaron duldes operatives sobre los criterios d'aplicación, en relación coles Ufiertes Públiques d'Empléu (tantu la xeneral como la específica pa la estabilización) que faen pensar en futuros retrasos y pleitos nes convocatories.

 

Tamién s'analizó la esixencia del Plan Antifraude qu'impon  la recién normativa del Ministeriu de Hacienda pa los beneficiarios de los fondos europeos con dalguna rellación al Plan de Recuperación, Tresformamientu y Resiliencia, y que tien de tar aprobáu antes de final d'añu. El Plan tien d'incluyir l'analís d'un mapa de riesgos de los procesos críticos  y tamién ferramientes  frente a la corrupción. Va Influyir nos programes de formación del Personal d'Alministración y Servicios, yá que tendrán d'incluyir cursos específicos sobre ética y valores, según apartaos concretos del tema nes acciones formatives xenerales. 

 

El Grupu 9 d'Universidaes, G-9, ye una asociación conformada poles universidaes públiques que son úniques nes sos respectives comunidaes autónomes: Universidá de Cantabria, Universidá de Castiella-La Mancha, Universidá d'Estremadura, Universitat de les Illes Balears, Universidá de La Rioxa, Universidá d'Uviéu, Universidá del País Vascu/Euskal Herriko Unibertsitatea, Universidá Pública de Navarra y Universidá de Zaragoza.

 

Les universidaes del G-9 cuenten con 170.000 estudiantes, 19.340 miembros del personal Docente e Investigador y 8.160 miembros del personal d'Alministración y Servicios.