La Universidá d'Uviéu lidera una investigación sobre l'orixe de los cultivos n'espacios aterrazados en Ayacucho (Perú)
Los andenes y terraces de los sistemes agrícoles reflexen la densa conocencia de les civilizaciones prehispániques sobre les posibilidaes de producir de los distintos nichos ecolóxicos andinos | El resultáu de los estudios arqueolóxicos dexa matizar cronoloxíes y dexa también ver la complexidá de la construcción de los andenes con continues renovaciones, adaptaciones y cambios nos cultivos
El grupu d'investigación LLABOR de la Universidá d'Uviéu lidera, en collaboración cola Pontificia Universidá Católica del Perú, una investigación arqueolóxica sobre l'orixe del sistema de andenería (terraces agraries) nel valle de Sondondo, en Ayacucho (Perú). Los trabayos arqueolóxicos, que cuenten col financiamientu de la Fundación Palarq, tán dirixíos por Patricia Aparicio Martínez, doctoranda de la Universidá d'Uviéu y profesora de la Pontificia Universidá Católica del Perú y Margarita Fernandez Mier, catedrática del Departamentu d'Hestoria de la Universidá d'Uviéu.
Dambes arqueólogues señalen que, na rexón andina, kilómetros d'empinaes fasteres foron aterrazadas creando impresionantes paisaxes qu'estendieron la frontera agrícola y dexaron superar les llimitaciones orográfiques y climátiques de la rexón. "Los espectaculares asentamientos de Machu Picchu, Pisac, Ollantaytambo, Chinchero o Tipón nun pueden entendese ensin los aterrazamientos agrícoles del so entornu, que definen un paisaxe maxestoso y icónico que nos tresporta a los remotos tiempos de la rellumanza del Imperiu Inca y los sos predecesores", afirma la profesora de la universidá asturiana.
Los andenes y terraces de los sistemes agrícoles reflexen la densa conocencia local sobre les posibilidaes de producir de los nichos ecolóxicos andinos. Esos saberes tradicionales materialízense na construcción de distintos tipos de campos de cultivu sobre fasteres pindies, sofitaos en muros de piedra y col diseñu de complexos sistemes de regación, drenaxe y redes de caminos integraos ente los andenes.
La andenería ye especialmente espectacular nel valle de Sondondo, alcontráu nel centru sur del país, ente les dos rexones onde se xestaron los imperios andinos más sobresalientes: l'Imperiu Huari (600-1000 d.C.) nel departamentu de Ayacucho y l'Imperiu Inca (1450-1532 d.C.) nel departamentu de Cusco.
Les investigaciones precedentes realizaes sobre l'agricultura prehispánica consideren que'l pueblu Huarpa (100 d.C. – 500 d.C.) usó andenes al norte de Ayacucho para irrigar zones semiáridas y priorizar el cultivu del maíz y que la xeneralización de terraces agrícoles débese al cultivu d'esti cereal por parte del primer Imperiu andín, los Huari (550 d.C. hasta 1000 d.C.) y, sobremanera, al floreciente y espansivu Imperiu Inca dende 1450 d.C, que llegó a conquistar una parte importante del continente suramericanu.
Sicasí, la hestoria contada polos andenes revela un procesu bien complexu que ye posible entender cola aplicación de l'arqueoloxía agraria. L'oxetivu del proyectu ye estudiar estes terraces del valle de Sondondo, conocer la so cronoloxía y analizar qué se cultivó nellos. "¿Cuándo se construyeron estos sistemes y cómo evolucionaron? ¿Cómo yeren los usos del suelu naquellos tiempos? ¿Camudaron los cultígenos, les práctiques agraries y la tecnoloxía? ¿Cómo se rellacionen los andenes coles piedres llabraes que chisquen tol valle y cuál ye la so simboloxía?", ye lo que se pregunten los investigadores.
Lo resultante de los estudios realizaos hasta'l momento ye qu' amuesen la complexidá de la construcción de los andenes con continues renovaciones, adaptaciones y cambios nos cultígenos, con un importante protagonismu del maíz, como yera d'esperar, pero cola presencia d'otros, como la quinua, qu'apaecen nos niveles más antiguos.
L'oxetivu de la campaña desendolcada nel mes d'ochobre foi llograr secuencies cronolóxiques sólides que rellacionen los andenes y les sos distintes fases constructives colos periodos históricos. A la espera de ver lo que resulta de les analítiques arqueobiológicas, los sondeos fechos na recién campaña apurren datos relevantes : baxo les terraces escavaes alcontraren estructures constructives adscribibles a los períodos históricos menos representaos nos xacimientos arqueolóxicos del valle: el Periodu Entemediu Tempranu.
Los impresionantes campos de cultivu amortizan los llugares d'hábitat de dómines precedentes, lo que dexó, yá dende estos primeros sondeos, complejizar tantu la información sobre les árees cultivaes, como alcontrar zones d'hábitat pertenecientes a les distintes cultures que s'asocedieron nel valle. Con ello, llogróse unu de los primeros oxetivos plantegaos nel proyectu: constatar la validez metodolóxica de l'arqueoloxía agraria que l'equipu aplicara en diverses árees del Cordal Cantábricu con resultancies espectaculares y qu'agora se confirma que resulta eficaz tamién pa estudiar los espacios agrarios andinos.
Galería d'imaxes
