Los fotoperiodistes Eduardo Urdangaray y Ramón Jiménez percorrieron mientres trés décades les cuenques mineres del carbón n'Europa y traxéronse de vuelta más de 30.000 imaxes que comparten un nexu común, un ADN de los territorios del carbón y de los mineros que los habiten. Frutu d'esti ingente trabayu ye la selección de les 50 fotografíes qu'integren la esposición Tierra negra. Mines y mineros que s'inauguró esta tarde nel Claustru Altu del Edificiu Históricu de la Universidá d'Uviéu.

 

L'apertura de l'amuesa cuntó cola presencia de los dos fotoperiodistes autores del trabayu y de la vicerrectora d'Estensión Universitaria y Proyección Cultural, Carmen Adams. La presentación de la esposición corrió a cargu del periodista Fernando Quintela.

 

Tierra negra. Mines y mineros trata de responder a la siguiente entruga: ¿comparten les cuenques mineres del carbón n'Europa xuna hestoria común? Dambos fotoperiodistes, en percorriendo miles de kilómetros captando la esencia d'esta actividá industrial, conclúin qu'esisten dellos llazos d'unión. L'actividá minera hai cincelado los territorios, la so economía y la so sociedá. Nes imaxes que s'amuesen hasta'l 21 de payares na Universidá d'Uviéu, puede trazase un percorríu históricu dende la puxanza económica hasta'l cayente de l'actividá minera pasando pol tresformamientu del territoriu, la crecedera demográfica y el so posterior abandonu.

 

Eduardo Urdangaray (Mieres, 1969) y Ramón Jiménez (Llangréu ,1962) dispararon los sos cámares miles de vegaes en pozos mineros, asamblees de trabayadores, protestes y manifestaciones. Tamién recoyeron el dolor de los accidentes de la mina y l'emoción de los funerales de la familia minera.

 

El autores escoyeron 700 de les 30.000 fotografíes para la publicación de los trés volumes de la so colección Tierra Negra. Mines y mineros y agora escoyeron 50 d'estes imaxes para la esposición de la Universidá. Les instantánees falen de la minería d'Asturies, Llión, Palencia o Teruel, pero tamién d'Alemaña, Francia, Polonia o la República Checa.