La Universidá d'Uviéu, xuntu cola compañía Merkle, van poner en marcha la nueva Cátedra Merkle de Ciencia de Datos y Marketing. Asina se recueye nel conveniu de constitución de la cátedra robláu esta mañana pol rector de la Universidá d'Uviéu, Ignacio Villaverde, y el Chief Executive Officer de Merkle España, Manuel Blanco.

 

La cátedra, creada nel marcu del nuevu grau en Ciencia ya Inxeniería de Datos que s'imparte esti cursu per primer vegada na Universidá d'Uviéu, ye frutu de la estrecha relación ente dos tales entidaes y de la necesidá de fomentar la cultura del datu ente los mozos. Naz como puntu d'alcuentru de trés disciplines -la Ciencia de Datos, la Inxeniería y el Marketing- pa la so aplicación práctica nel ámbitu empresarial. Dientro d'ella, van desenvolvese programes formativos, datathones, charres y seminarios qu'averen esti campu a los estudiantes y amuésen-yos les posibilidaes como futuru profesional.  

 

"Ye necesariu qu'el nuesu estudiantáu conoza de primera mano en qué consiste'l campu nel que se van a enfusar y les salíes d'empleabilidá que-yos ufierta. Y nada meyor que faelo de la mano d'una compañía como Merkle, qu'aplica la ciencia de datos en daqué tan concretu como'l CXM (Customer Experience Management)", esplica'l rector, Ignacio Villaverde. Amás, añede que "la Universidá d'Uviéu siempres ta abierta a esti tipu de collaboración cola empresa, qu'arriquez la formación del nuesu alumnáu". 

 

"Nel sector empresarial recibimos con gran prestu'l nuevu Grau de Datos de la Universidá d'Uviéu porque da respuesta a una demanda cada más creciente del mercáu. Al traviés de la Cátedra, dende Merkle queremos sofitar la formación de los estudiantes cola nuesa esperiencia y conocencia de los datos y el marketing, coles mesmes que promovemos el so insertamientu llaboral", declara Manuel Blanco, CEO en Merkle España. 

 

Na firma, xuntu al rector y al CEO de Merkle España, tamién tuvieron presentes la Vicerrectora de Tresferencia y Relaciones cola Empresa, Susana Menéndez Requejo y los dos directores académicos de la Cátedra Merkle, Juan José del Coz y Víctor Iglesias.