Dexar qu'estudiantes con escasos recursos económicos sigan cola so formación. Este ye l'oxetivu de la campaña Bisila Bokoko African Literacy Project na que participa la Universidá d'Uviéu col propósitu de dar una segunda vida a llibros usaos por qu'estudiantes de la Universidá de Guinea Ecuatorial puedan utilizalos. 

 

La campaña, frutu de la collaboración desinteresada de la comunidá universitaria, lleva recoyíes hasta'l momentu un total 45 caxes de llibros, más de 800 volumes, que van partir faía'l país africanu, vía Barcelona. La iniciativa cunta tamién cola collaboración de la empresa Alsa que va tresportar el material dende Asturies hasta la capital catalana. L'unviada produció'l xueves pela mañana, tres un curtiu alcuentru calteníu entre Humberto R. Solla, vicerrector de Relaciones Institucionales y Coordinación de la Universidá d'Uviéu; Robeca Zrezal, directora d'Área de Cooperación, Tercer Sector y Responsabilidá Social, y Javier Martínez Prieto, director zona Cornisa de Alsa.

 

La Biblioteca de la Universidá d'Uviéu y l'Área de Cooperación al Desenvolvimientu, Tercer Sector y Responsabilidá Social lideren n'Asturies ta campaña solidaria que va devolver xuna nueva vida a los llibros usaos por universitarios asturianos. Los volumes van llegar a Barcelona antes del 29 de mayu pa partir dende ellí al so destín final. Los llibros donaos enceten árees de la conocencia que van dende derechu a Periodismu, pasando por Ciencies Polítiques o Medicina y Psicoloxía, toos ellos, estudios que s'imparten na Universidá de Guinea Ecuatorial. 

 

Humberto R. Solla, vicerrector de Relaciones Institucionales y Coordinación de la Universidá d'Uviéu, estimó la collaboración de la comunidá universitaria y la so respuesta al llamamientu realizáu por esta campaña de solidaridá. Solla destacó tamién que la iniciativa respuende al compromisu de la institución académica asturiana de favorecer l'accesu a la formación universitaria d'aquellos colectivos más desfavorecidos. 

 

Pela so parte, Robeca Cerezo, directora d'Área de Cooperación, Tercer Sector y Responsabilidá Social, añede que "el próximu cursu gustaríanos activar de nuevu la campaña, ampliando'l so algame ya implicando a tolos colectivos, estudiantes, profesoráu y PAS, y convidando tamién a tola comunidá asturiana a faer les sos donaciones". "El nuesu oxetivu ye contribuyir al fortalecimientu institucional de la educación cimera en países con menos recursos", conclúi.

 

Javier Martínez Prieto, director zona Cornisa de Alsa, declara que "con esta acción, Alsa suma al so compromisu tradicional con Asturies y cola Universidá d'Uviéu, el poder poner un tresporte que conecta a ciudadanos de dos continentes, p'ameyorar la vida de los universitarios de Guinea Ecuatorial".