El rector Ignacio Villaverde y la directora de l'axencia, Mercedes Siles, van trabayar conjuntamente por que'l nuevu sistema d'evaluación docente sía percibíu positivamente pol profesoráu
La Universidá d'Uviéu y l'Axencia Nacional d'Evaluación de la Calidá y Acreditación (ANECA) caltuvieron esta mañana una xunta para avanzar na implantación del nuevu sistema d'evaluación docente Docentia. Ignacio Villaverde, rector de la universidá asturiana, y Mercedes Siles Molina, directora de l'axencia, tuvieron ocasión d'intercambiar paeceres sobro cómo va ser el nuevu modelu d'evaluación docente y cómo faer que sía percibíu positivamente pol profesoráu de les instituciones d'enseñanza cimera.
El rector señaló que la Universidá d'Uviéu aprovechó esta primera toma de contactu pa treslladar a la ANECA "les nueses propuestes y moliciones sobro Docentia de manera que nun sía un modelu más d'evaluación de la calidá docente, sinón que realmente sirva p'ayuda a el profesores a ameyorar la calidá de la enseñanza qu'imparten".
La directora de la ANECA, pela so parte, concretó los distintos plazos de les acciones nes que trabaya l'axencia. Asina, Siles especificó que Docentia va tar enllantáu yá anguaño, al igual que los sexenios de tresferencia, y avanzó que, en paralelu, el so equipu trabaya na definición de los criterios por que'l nuevu sexeniu docente pueda entrar a valir el próximu añu acordies con los plazos de convocatoria que remana'l ministeriu.
La directora de la ANECA esplicó que la visita a Asturies forma parte de les xuntes que ta calteniendo'l nuevu equipu directivu de l'axencia qu'empezó'l so trabayu'l 19 de febreru del pasáu añu. "Queríamos tresllada-y al equipu rectoral tolo que tamos faciendo pa potenciar la calidá del sistema d'educación cimera", dixo Siles. La directora añedió que mañana xueves va tener llugar xuna sesión de Conversaciones cola ANECA pa esclariar a les universidaes distintes cuestiones rellacionaes col plan Docentia. "El nuesu oxetivu ye ayudar a les universidaes pa facilitar la so implantación", concluyó.
Esta primera toma de contactu ente dambes instituciones cuntó cola asistencia del rector de la Universidá d'Uviéu, Ignacio Villaverde, acompañáu del vicerrector de Xestión Académica, José Miguel Arias; el vicerrector de Polítiques de Profesoráu, Pedro Alonso; y el vicerrector de Relaciones Institucionales y Coordinación, Humberto Rodríguez Solla, y de la directora de ANECA, Mercés Siles Molina, y Lázaro Rodríguez Ariza, xerente de ANECA.
