La Universidá d'Uviéu realizó una investigación para proponer una serie de midíes que puedan amontar el númberu d'empreses que salen a Bolsa nel nuesu país. A esti respectu, el trabayu, dirixíu pola profesora d'Economía Financiera Susana Álvarez Oteru, señala la importancia de promover la participación de pequeñes y medianes empreses nos mercaos de valores, ameyorar la fiscalidá, crear una cultura de participación nos mercaos d'acciones y reconocer el papel que tienen los mercaos nel desenvolvimientu d'una economía sostenible.

 

Les resultancies d'esta investigación, desenvuelta nel marcu d'un contratu de tresferencia con Bolses y Mercaos Españoles (BME), acaben de presentase nel Panel de Siguimientu Financieru del Institutu Español d'Analistes Financieros y la Fundación d'Estudios Financieros, xuntu con representantes del Bancu d'España y de la Comisión del Mercáu de Valores (CNMV). 

 

Esta ye la segunda vegada que la profesora Álvarez Oteru collabora con BME nun contratu d'estes característiques. Nesti sentíu, en 2014 ellaboró un documentu nel qu'investigaba l'efectu de la cotización bursátil sobro'l nivel d'empléu de les empreses españoles, trabayu que foi citáu nel "European IPO Report: Recommendations to improve conditions for European IPO markets", publicáu en 2020 pola Comisión Europea. 

 

Susana Álvarez Oteru defendió nel añu 2000 la primer tesis española dedicada al estudiu de les anomalíes derivaes del procesu d'entamu de cotización bursátil, y desenvolvió la so carrera investigadora con publicaciones en dichu riolo. Anguaño trabaya tamién en cuestiones venceyaes cola inversión socialmente responsable.