El catedráticu de Derechu Constitucional, Ignacio Villaverde Menéndez, foi escoyíu rector de la Universidá d'Uviéu nes primeres votaciones electróniques que celebró la institución académica na so hestoria. Villaverde foi escoyíu pol 52,45 % de los votos, frente al 47,50 % que llogró l'otru candidatu y actual rector, Santiago García Granda.

 

Ignacio Villaverde Menéndez ye miembru fundador del Grupu d'Excelencia DERECONS, y sociu constitutivu de l'Asociación de Constitucionalistas d'España, a que la so xunta directiva pertenez dende 2013. Participó en proyectos d'investigación nacionales (8) y europeos (1). Ye autor de dellos llibros y numberosos artículos científicos en revistes nacionales y estranxeres sobro derechos fundamentales, llibertá d'espresión ya información y derechu a ser informáu, derechu a la intimidá, al honor, protección de datos, tresparencia, xusticia constitucional y organización territorial del Estáu y foi profesor convidáu na Universidá Albert Ludwig de Friburgo, la London School of Economics and Politics, La Sapienza de Roma, el Departamentu de Derechu Constitucional de la Universidá de Florencia, y últimamente nel Institutu Max Planck de Derechu Públicu Comparáu ya Internacional de Heidelberg.

 

Na universidá asturiana, Villaverde desempeñó los cargos de secretariu del Departamentu de Derechu Públicu, secretariu xeneral, vicerrector de Coordinación, Comunicación y Relaciones Institucionales, y secretariu del Conseyu Social. Fora de la institución académica foi lletráu del Tribunal Constitucional, director de l'Asesoría Xurídica del Conceyu de Xixón y conseyeru del Conseyu de la Comunicación del Principáu d'Asturies.