La collaboración CMS del Gran Colisionador de Hadrones (LHC) del CERN reconoció con unu de los premios CMS 2021 a Javier Fernández Menéndez, investigador del Departamentu de Física de la Universidá d'Uviéu y del Institutu Universitariu de Ciencies y Tecnoloxíes Espaciales d'Asturies (ICTEA). El galardón, que reconoz a persones que fixeron contribuciones bien destacaes al esperimentu CMS, estrema nesti casu a Fernández Menéndez "pol so escelente lideralgu na operación, caltenimientu y desenvolvimientu del sistema de monitorización calidable de los datos".

 

En concretu, el llabor de Fernández Menéndez dexa asegurar la calidá de les resultancies que produz el trabayu conxuntu de más de 3.000 científicos y científiques ya inxenieros ya inxenieres de too el mundu, como responsable dende 2017 del sistema de Monitorización de la Calidá de los Datos del esperimentu CMS (Data Quality Monitoring, DQM). D'esta miente, l'investigador coordina al grupu de persones (unes 600) que trabaya nel DQM, asegurándose de que funciona afechiscamente y de qu'evoluciona d'alcuerdu a les necesidaes del esperimentu, siempres crecientes, y a les meyores técniques disponibles. El DQM produz decenes de miles de gráficos distintos de cada unu de los subsistemas del detector. Para facilitar el trabayu, una de les acciones qu'impulsó Javier Fernández Menéndez ye l'adopción de técniques de Machine Learning.