La lluz xuega un papel esencial na ciencia y la tecnoloxía modernes, con aplicaciones que van dende la comunicación óptica rápida hasta'l diagnósticu médicu y la ciruxía láser. En munches d'estes aplicaciones, la interacción de la lluz na nanoescala (la denominada nanoluz) cola materia resulta de vital importancia. Nesta llínea d'investigación, la Universidá d'Uviéu collaboró col CIC nanoGUNE BRTA y el Centru Internacional de Física de Donostia para emplegar una técnica de nanoimagen col fin d'estudiar cómo la nanoluz y les vibraciones moleculares interactúan ente sí. Les imaxes revelen que puede llograse acoplamientu vibracional fuerte, que ye un fenómenu qu'apocayá atrai gran atención pol so usu potencial pa controlar les propiedaes físiques y químiques fundamentales de los materiales. La resultancia podría conducir al desenvolvimientu d'una plataforma novedosa pa la identificación química en chip de pequenes cantidaes de molécules y p'estudiar los aspeutos fundamentales de los fenómenos d'acoplamientu fuerte ente lluz y materia a escala nanométrica. El trabayu, nel que la Universidá d'Uviéu collaboró al traviés del profesor Pablo Alonso González y el doctorandu Javier Taboada Gutiérrez, foi publicáu na prestixosa revista científica "Nature Photonics".

 

En frecuencies infrarroxes, la lluz puede interactuar con molécules al traviés de les sos vibraciones a frecuencies específiques. Por esa razón, los materiales moleculares pueden identificase midiendo los sos espectros de tresmisión o reflexón infrarroxa. Esta técnica, de cutiu llamada espectroscopia de buelgues dactilares infrarroxes, utilízase llargamente pal analís de sustances químiques, biolóxiques y médiques.

 

Apocayá afayóse que la interacción ente la lluz infrarroxo y les vibraciones moleculares pue ser tan fuerte que eventualmente modifíquense les propiedaes del material, como la conductividá y la reactividad química. Esti efectu, llamáu acoplamientu vibracional fuerte, depende en gran midida de la cantidá de molécules utilizaes, lo que desafía la implementación d'aplicaciones. 

 

Nel estudiu, el autores detallen cómo puede refugase esti problema emplegando nanoluz. Pablo Alonso González señala que "la escitación de nanoluz en capes atómiques de nitruro de boro hexagonal (h-BN) dexa la visualización d'acoplamientu vibracional fuerte con unes poques molécules orgániques". "Les imaxes amuésennos que la nanoluz ta fuertemente atenuada a la frecuencia de la vibración molecular, lo que podría ser interesante pa futures aplicaciones de detección", afirma l'investigador.

 

La posibilidá d'un fuerte acoplamientu ente lluz y molécules na escala nanométrica podría utilizase nel futuru pal desenvolvimientu de dispositivos de espectroscopia ultrasensibles o pa estudiar aspeutos cuánticos hasta agora non accesibles.