La investigación derivada de AMBER, un consorciu colaborativo enmarcáu nel  proyectu Horizonte 2020 coordináu pola Universidá de Swansea y nel que participa la Universidá d'Uviéu, afayó que los ríos d'Europa tienen siquier 1,2 millones de barreres qu'atayen el fluxu de l'agua. La profesora Eva García Vázquez y la doctora Sara Fernández, del Departamentu de Bioloxía Funcional, y el profesor Eduardo Dopico, del Departamentu de Ciencies de la Educación, tuvieron arreyaos nesta investigación.

 

Les resultancies publicaes güei en Nature (https://doi.org/10.1038/s41586-020-3005-2) amuesen qu'Europa tien probablemente dalgunos de los ríos más estazaos del mundu. L'estudiu detectó miles de grandes preses, pero tamién una miríada d'estructures más baxes como preses, alcantarielles, vaos, compuertes y ramples que nun taben inventariaes y que son les principales culpables de la fragmentación de les agües fluviales.

 

Utilizando modelos de barreres y comprobaciones refeches sobro'l terrén, l'estudiu envaloró qu'hai siquier 0,74 barreres por km de calce de ríu. Estos datos sirvieron pa crear el primer inventariu paneuropéu completu de barreres, l'Atles de barreres AMBER (https://amber.international/european-barrier-atles/). "El nivel de fragmentación de los ríos n'Europa ye muncho mayor de lo que naide antemanara", diz Barbara Belletti, geomorfóloga fluvial que dirixió l'estudiu nel Politecnico di Bilanu y agora ta nel CNRS, el Centru Nacional Francés d'Investigación Científica.

 

"Munches barreres tán obsoletas y esaniciales brinda oportunidaes de restauración ensin precedentes", diz Carlos de García de Leániz, coordinador de AMBER; "Les nueses resultancies incorpórense directamente a la nueva Estratexa de Biodiversidá de la UE y van ayudar a reconectar siquier 25.000 km de ríos d'Europa pa 2030".

 

Según Eva García Vázquez, investigadora principal de AMBER na Universidá d'Uviéu, "n'España, como n'otros países del sur d'Europa, el cambéu climáticu ta teniendo un mayor impacto qu'en llatitúes cimeres. Por eso ye imprescindible xestionar los ríos de forma más sostenible pa garantizar la salú de los sos ecosistemes, conciliando les reserves d'agua cola biodiversidá fluvial".

Sobre AMBER

 

AMBER recibió financiamientu del Programa d'Investigación ya Innovación Horizonte 2020 de la Unión Europea en virtú del Alcuerdu de subvención 689682.

 

AMBER aplicó una estratexa de xestión adaptativa a preses y otres barreres fluviales pa llograr un usu más sostenible de los recursos hídricos y una restauración más eficiente de la conectividad de los calces europeos. El proyectu desenvolvió ferramientes y simulaciones p'ayudar a les empreses y consorcios xestores de los ríos a maximizar los beneficios de les barreres embriviendo los sos impactos ecolóxicos. Les principales resultancies de AMBER inclúin:

 

• Trés informes de política fluvial

• Meyora de la migración de pexes na presa de Poutès en Francia por aciu estratexes de xestión adaptativa •

La eliminación de vertideru ensin utilizar nel Reinu Uníu, España, Irlanda y Dinamarca

• Delles ferramientes de sofitu a les decisiones de restauración de ríos

• La revista Let It Flow pa compartir investigaciones, resultancies y la visión de reconectar ríos

• Más de 25 publicaciones científiques revisaes por pares Materiales educativos pa centros escolares y pa la población polo xeneral

• The Barrier Tracker: la primer aplicación de ciencia ciudadana pa smartphones que rexistra les barreres fluviales n'Europa

 

Toles producciones científiques de AMBER tán disponibles gratuitamente y pueden descargase dende'l sitiu web del proyectu (https://amber.international/)