La Universidá d'Uviéu y ONTIER creen la Cátedra de Redes Empresariales ente Asturies y Llatinoamérica
Ente los sos oxetivos principales tán la formación de redes empresariales ente Asturies y Llatinoamérica y el sofitu al procesu d'acreditación internacional de la Facultá d'Economía y Empresa énte la Association to Advance Collegiate Schools of Business (AACBS)
El rector de la Universidá d'Uviéu, Santiago García Granda, y el director xeneral de Negociu de ONTIER España, Carlos Ranera González, roblaron de manera telemática'l conveniu de constitución de la Cátedra ONTIER de Redes Empresariales ente Asturies y Llatinoamérica.
Los principales oxetivos d'esti alcuerdu, que tien una vixencia inicial de cuatro años, son la investigación sobre la esportación de talentu, principalmente a Llatinoamérica; la so torna en forma d'inversiones y el fomentu de redes empresariales y de contactu ente los asturianos emigraos y les segundes y terceres xeneraciones que busquen oportunidaes d'inversión nel Principáu. Coles mesmes, sofitar el procesu d'acreditación internacional de la Facultá d'Economía y Empresa énte l'Association to Advance Collegiate Schools of Business (AACBS).
Pa llogralo, dambes instituciones van poner en marcha activiá de proyección internacional, de formación y empleabilidá -como ayudes formatives al estudiantáu y práctiques remuneraes- y de tresferencia y divulgación.
La nueva cátedra, la quinta que robla la Facultá d'Economía y Empresa de la universidá asturiana, cuenta con una dotación añal de 5.000 euros y va tar dirixida por María José García Salgado, secretaria académica de la Facultá d'Economía y Empresa.
L'alcuerdu foi suscritu, en representación d'ONTIER pol director xeneral de negociu de la firma, Carlos Ranera, que destacó "el valir de la innovación que se xenera na collaboración público/privada" y la ilusión xenerada nel despachu por un proyectu "de llargu y fondu percorríu" dafechu parte de los valores de compromisu social del bufete. Carlos Ranera recordó, coles mesmes, l'estrechu venceyu hestóricu y de cotidiana presencia que xune a ONTIER con Uviéu y con Asturies.
ONTIER ye un despachu d'abogaos internacional qu'ufierta tou tipu de servicios xurídicos, destacando les transacciones mercantil y comercial de gran complexidá. El llar de la firma ta en Londres, con oficines en 13 países, con especial presencia y allugamientu nel mercáu Latam.
Galería d'imaxes
