El rector de la Universidá d'Uviéu, Santiago García Granda, y la presidenta de l'Asociación para la Participación de la Sociedá Civil Uviéu21, Ana Miralles Gómez, roblaron un conveniu de collaboración que la so finalidá ye fomentar la formación y el desenvolvimientu en valores humanos del estudiantáu y la so participación na sociedá civil.

 

Nel marcu d'esti alcuerdu, que tien una vixencia inicial de trés años, dambes instituciones van impulsar xornaes de formación ya información, conferencies y foros d'investigación y de discutiniu de diverses temátiques  coles mires d'espublizar la conocencia y venceyar estratexes universitaries y llaborales para l'estudiantáu fomentando'l emprendimiento, la formación tresversal y el compromisu social al traviés de la participación. 

 

L'Asociación para la Participación de la Sociedá Civil Uviéu21 ye una organización ensin ánimu d'arriquecimientu que los sos socios son miembros activos de la sociedá civil d'Uviéu qu'apurren dedicación y talentu para'l desenvolvimientu de la ciudá y, por estensión, del conxuntu del Principáu. Ente los sos fines fundacionales tán promover la participación activa de la sociedá uvieina na vida del conceyu, collaborar na protección del patrimoniu históricu-cultural del conceyu y desenvolver iniciatives que beneficien a los sos vecinos, ente otros.