Una investigación de la Universidá d'Uviéu demostró qu'esiste un fraude xeneralizáu na comercialización de les zamburiñes n'Asturies. Les resultancies, que vieron la lluz na revista científica "Food Control", revelaron qu'un 49 % de los productos analizaos taben mal etiquetaos (73 de les 148 amueses analizaes), na so mayor parte por cuenta de que sustituyíen les zamburiñes por otra especie distinta, principalmente volandeires. Coles mesmes, l'analís de los platos de 20 restoranes, qu'apaecíen nos menús como "zamburiñes", concluyó que nel 100 % de los casos la especie que s'ufiertaba yera la vieira del Pacíficu (Argopecten purpuratus), una especie producida por acuicultura, conxelada y nativa de les mariñes de Perú y Chile. 

 

Esti estudiu supón la primer evaluación de los niveles de fraude nestes especies con amueses de dolce supermercaos y pequeños comercios qu'ufierten pectínidos presentaos como productos frescos, conxelaos y enlataos, amás en dieciocho restoranes qu'ufierten "zamburiñes" n'Asturies y dos restoranes d'otres provincies. Realizáronse identificaciones taxonómiques y xenétiques de les amueses llograes, utilizando fragmentos parciales de ARNr del xen 16S mitocondrial. 

La llexislación española, acordies cola regla de "un nome, un pexe", define'l nome "zamburiñes" pa designar una especie específica: Mimachlamys varia. Anque les sustituciones atopaes pueden nun ser notables dende'l puntu de vista nutricional, les implicaciones económiques, y hasta sanitaries, pueden ser significatives pola diferencia en precios ente les especies estudiaes y el tipu y l'orixe de los productos usaos pa facer les sustituciones. El fraude alimentariupuede implicar daños económicos, violaciones del drechu del consumidor y, sobremanera, efectos negativos sobre la correcta xestión y planificación d'esplotación de recursos marinos.

 

Esti artículu tien como primer autora a la doctoranda Marina Parrondo Lombardía. La investigación financióse'l programa rexonal d'investigación d'Asturies pa grupos d'investigación (FC-GRUPIN-IDI/2018/000201). Marina Parrondo fai la so tesis doctoral sobre l'usu de ferramientes xenétiques pal manexu sostenible de los invertebraos marinos n'esplotación n'Asturies. La tesis desenvuélvese nel programa de doctoráu de la Universidá d'Uviéu d'Inxeniería Química, Ambiental y Bioalimentaria embaxo la dirección de el profesores Yaisel J. Borrell y la directora del Centru d'Esperimentación Pesquera (CEP) de Xixón, Lucía García Flórez y la so defensa ta prevista pal próximu cursu 2020-2021.

 

Espublización

Parrondo, M; López, S.; Aparicio-Valencia, A.; Fueyo, A.; Quintanilla-García, P.; Arias, A. & Borrell, Y.J. (2020).  Almost never you get what you pay for: Widespread mislabeling of commercial "zamburiñas" in northern Spain. Food Control. https://doi.org/10.1016/j.foodcont.2020.107541