L'amuesa, que pue visitase nel Edificiu Hestóricu hasta'l 23 d'agostu, foi escurrida por estudiantes del Máster n'Estudios Avanzaos n'Hestoria del Arte, Investigación y Xestión
El vicerrector d'Estensión Universitaria y Proyección Internacional, Francisco José Borge, presidió esti meudía, na Sala d'Esposiciones del Edificiu Hestóricu, la inauguración de l'amuesa "Involutio. El patrimoniu abandonáu d'Asturies al traviés de la obra de Federico Granell", una amuesa que calificó d'"especial" por un triple motivu: ye la primera que se fai na Universidá dempués del confinamientu; tien como protagonista a un autor asturianu nuevu, pero que cunta yá con un llargu percorríu; y ñaz d'un proyectu formativu del Máster n'Estudios Avanzaos n'Hestoria del Arte, Investigación y Xestión, que remata cola apertura de la iniciativa a la sociedá.
Pela so parte, Federico Granell estimó a la Universidá y a les y los alumnos del máster el trabayu realizáu nesta amuesa, que ta fecha "con munchu ciñu y que ye un luxu que pueda esponese nesti espaciu". Coles mesmes, la directora del máster, Ana Fernández, espresó la so almiración por Granell, un artista que "exemplifica la guapura de la decadencia y establez una xunión ente'l pasáu y el presente que lu venceya a Edward Hopper: la pintura como espaciu natural de la imaxinación y la fabulación, non solo del artista sinón tamién del espectador".
En representación del alumnáu del máster tomó la pallabra Javier Martínez, graduáu n'Hestoria del Arte, que señaló que "la xunión ente l'arte y la so redolada faise patente nes interpretaciones individuales que caún de nós faiga al güeyar les obres". Tamién tuvo presente nel actu inaugural la directora d'Área d'Estensión Universitaria, María Álvarez.
Nes distintes intervenciones púnxose de relieve'l trabayu realizáu pol estudiantáu, que tuvo qu'articular el gruesu d'esta amuesa en plenu confinamientu, dende les sos cases, cola dificultá añadida qu'esto supón, y sorrayóse amás el llabor desenvueltu por Sara Vázquez-Canónico, técnica d'esposiciones de la Universidá.
La esposición va poder visitase hasta'l 23 d'agostu. Horariu de visites: de llunes a vienres de 11 a 14 hores y de 17 a 19:30 hores, y los sábados y domingos de 10:30 a 14:30 hores.
