Un equipu científicu internacional de la Universidá d'Uviéu, el Centru d'Investigación en Nanomateriales y Nanotecnología (C1NN) del CSIC en L'Entregu, el Donostia International Physics Center DIPC de San Sebastián y l'Institutu de Tecnoloxía d'Austria IST, llogró un finxu para'l desenvolvimientu de nueves tecnoloxíes al controlar l'espardimientu de lluz na nanoescala. El personal investigador demostró esperimentalmente dichu control en determinaos materiales de la familia de van der Waals, a la que tamién pertenez el grafeno, que pueden estremase fácilmente en llámines, como si fuera un paquete de folios, que se dixebren fácilmente. Para ello utilizaron dos llámines d'un material que tien unes dimensiones d'espesura de decenes de nanómetros (les rexones del espaciu nanométricas son cien vegaes más pequenes que la espesura d'un pelo humano), una xirada respectu de la otra. L'afayu, publicáu na revista "Nano Letters", tien aplicaciones en sensores y control del calor na nanoescala.

 

El investigadores repararon que so un ciertu ángulu de rotación (ángulu críticu) ente les llámines de trióxidu de Molibdenu de la estructura, l'espardimientu de nanoluz asocedía solamente a lo llargo d'una determinada dirección espacial ensin les llimitaciones de la estructura cristalina del material. "Foi realmente emocionante reparar per primer vegada l'espardimientu tan inusual de polaritones (ondes superficiales metá lluz, metá materia) nestes estructures rotadas; paecía como si l'ángulu de rotación ente les llámines fixera un trucu de maxa obligando a los polaritones a viaxar a lo llargo d'una dirección específica", diz Jiahua Duan, investigador posdoctoral nel grupu de "Nano-óptica Cuántica" de la Universidá d'Uviéu.

 

"Esti nuevu grau de llibertá basáu na rotación de llámines en materiales de van der Waals puede utilizase como direccionador dexando controlar l'espardimientu de nanoluz, con importantes implicaciones nel desenvolvimientu de les futures tecnoloxíes de la información y les comunicaciones", añede Javier Martín Sánchez, investigador Ramón y Cajal nel mesmu grupu.

 

Esti control ensin precedentes nel espardimientu de la nanoluz en dichos materiales representa un elementu fundamental para la integración de futures tecnoloxíes en nanofotónica. "La posibilidá d'emponer l'espardimientu de lluz na nanoescala a lo llargo de direcciones específiques va dexar el desenvolvimientu de nueves ya interesantes aplicaciones en sensores biolóxicos, aplicaciones en tecnoloxíes cuántiques o aprovechamientu del calor na nanoescala", señala Alexey Yu Nikitin, investigador Iberbaske del Donostia International Physics Center.

 

Como queda de manifiestu nesti estudiu, el sintonizado de les propiedaes óptiques n'estructures compuestes por dos llámines de cristales de van der Waals, nes qu'una d'elles atópase rotada al respective de la otra, apurre nueves funcionalidades nel emerxente campu de la nano-óptica. Pablo Alonso González, líder del grupu de "Nano-óptica Cuántica", esplica que "los nuesos afayos dexen estender el conceutu subxacente nel apocayá establecíu campu de la ‘twistrónica' al mundu de la óptica, sentando asina les bases d'un nuevu campu de la ‘twistóptica'".

 

 

Detalles del artículu