El rector de la Universidá d'Uviéu, Santiago García Granda, y la vicerrectora d'Estudiantes, Elisa Miguélez González, caltuvieron una xunta telemática cola conseyera d'Educación, Carmen Suárez Suárez, para avanzar na planificación de les sedes y protocolos de seguridá de la Evaluación del Bachilleratu para l'Accesu a la Universidá (EBAU), entamada pola Universidá d'Uviéu y l'alministración educativa del Principáu d'Asturies.

 

Nesti alcuentru de trabayu, nel que tamién tuvieron presentes la directora xeneral d'Ordenación, Evaluación y Equidad, Paula García Martínez; y la directora xeneral d'Universidá, Cristina González Morán, estudióse ampliar les sedes de la prueba para ameyorar la distribución y la seguridá de los alumnos y alumnes de la zona central. Asina, a les yá conocíes sedes d'Uviéu, Xixón, Avilés, Mieres, Cangas, Tapia y Ribesella sumaríense agora les de Siero y Llangréu. Esta midida dexa redistribuir, una parte de les y los barganal de 2.000 aspirantes que s'esaminaríen n'Uviéu y facilita la movilidá de quien moren nesos conceyos.

 

Tamién s'avanzó na planificación de la prueba y na ellaboración del protocolu de seguridá que la arrodia y que tán ellaborando les y los técnicos de prevención de la Universidá d'Uviéu y del Principáu cola collaboración de la Delegación del Gobiernu, cola supervisión de la Conseyería de Salú. Mientres esta selmana van llevar a cabu visites a les distintes instalaciones per parte de la vicerrectora y la directora xeneral para evaluar, in situ, los recursos y les necesidaes de les distintes sedes. Les especiales característiques de la prueba, nes presentes circunstancies, riquen d'una especial coordinación y la movilización de más recursos que n'una situación de normalidá.

 

La convocatoria ordinaria de la prueba d'Evaluación del Bachilleratu para l'Accesu a la Universidá (EBAU), a la que tán llamaos unos 4.000 estudiantes, va tener llugar los díes 30 de xunu y 1 y 2 de xunetu y la convocatoria estraordinaria va celebrase los díes 21, 22 y 23 de xunetu.