Un total de 17 artistes plásticos y 16 escritores xunieron los sos esfuerzos para desenvolver l'amuesa "Uviéu", coordinada por Fermín Santos, que puede visitase hasta'l 24 de xunu na Sala d'esposiciones del Edificiu Históricu de la Universidá, y qu'axunta imaxes-estampes, pieces sonores y testos lliterarios sobro la capital asturiana.

 

La inauguración tuvo a cargu del vicerrector d'Estensión Universitaria y Proyección Internacional, Francisco José Borge, qu'esplicó que "la ciudá como espaciu vivu, autónomu, dotáu de facultaes qu'a güeyu pueden pasar desapercibíes, ye lo que podemos atopar nesta amuesa sobro la ciudá onde tamién s'asitia'l núcleu principal de la nuesa universidá, Uviéu". El vicerrector destacó cómo la ciudá acueye nel so senu "a un más que prometedor elencu d'artistes que güei s'axunten pa celebrar la so singularidá".

 

Na esposición desvélense les emociones que la ciudá remembra nes persones convidaes a formar parte del proyectu", como esplica Fermín Santos, pa quien l'amuesa tresmite la imaxe d'un Uviéu "que pretende fuxir del fadiu y la monotonía". L'amuesa cunta cola collaboración de la Conseyería de Cultura del Principáu d'Asturies, el Muséu de Belles Artes d'Asturies y l'Universidá d'Uviéu, y va xunida a una publicación homónima d'Ediciones Patanegra, ilustrada con estampes artístiques.

 

L'horariu de visita ye de llunes a vienres de 11 a 14 hores y de 17 a 20:30 hores, y los sábados de 10 a 13:30 hores. Del 15 al 24 de xunu l'horariu de tarde va amenorgase xuna hora. La entrada ye gratuita.