El xulgáu contenciosu alministrativu númberu 6 d'Uviéu tornó'l recursu presentáu pol Colexu Oficial d'Inxenieros de Mines del Noroeste d'España y l'Asociación Think Tank Escuela Mines Uviéu 2050 contra'l treslláu de los estudios de minería a la Escuela Politécnica de Mieres. Na demanda, l'asociación y l'órganu colexal impugnaben el cambéu de los cinco planes d'estudiu que s'impartíen na Escuela. 

El xulgáu considera que, en trés de los planes d'estudios, les entidaes demandantes nun tán legitimadas para recurrir, al nun tener relación directa dichos planes colos fines d'eses entidaes. Fai referencia en concretu a los másteres en Ciencia y Tecnoloxía de Materiales, Prevención en Riesgos Llaborales ya Inxeniería Enerxética. Al respective de los planes d'estudiu de graduáu/a n'Inxeniería de Tecnoloxíes Mineres y Máster universitariu n'Inxeniería de Mines, el xulgáu sí considera legitimados a los demandantes, pero refuga tolos argumentos emplegaos nel recursu. 

Lliteralmente, el Xulgáu señala que “el cambéu de los planes d'estudios realizóse correchamente, conforme al procedimientu llegal” y reflexa que na decisión intervinieron la universidá, la comunidá autónoma y órganos de l'alministración xeneral del estáu. La sentencia puede ser recurrida agora énte'l Tribunal Cimeru de Xusticia d'Asturies.