El Paraninfu de la Universidá d'Uviéu acoyó esta mañana la entrega del Premiu de Biomedicina Aplicada Valdés-Salas, que na so segunda edición recayó nel doctor Roger Gomis y l'empresa Inbiomotion. L'actu, presidíu pol rector, Vicente Gotor, cuntó tamién cola presencia del director xeneral d'Investigación Científica y Técnica del Ministeriu d'Economía y Competitividá, Juan María Vázquez.

El presidente del xuráu y catedráticu de Bioquímica y Bioloxía Molecular Carlos López-Otín presentó a los premiaos y destacó que ciertos tipos d'investigación, como la galardonada, sirven pa crear riqueza académica y económica.

El premiu concedióse nesta ocasión a Roger Gomis y Inbiomotion por identificar per primer vegada un xen que prediz el riesgu de les pacientes de cáncer de mama de desenvolver metástasis nos güesos.

Roger R. Gomis esplicó de volao la resultancia de la so investigación: un biomarcador únicu con especificidá pa escoyer pacientes que pueden beneficiase del usu d'axentes contra procesos de metástasis en güesos y que tien un índiz de fiabilidá del 98 per cientu. Coles mesmes, estimó'l premiu como "un estímulu" pa siguir cola so investigación. Pela so parte, el presidente del conseyu d'alministración de Inbiomotion, Jöel Jean-Mairet, destacó la importancia del sofitu del financiamientu priváu a la investigación pública, que puede producir riqueza n'empreses altamente innovadores.

El rector, Vicente Gotor, alvirtió na so intervención qu'apostar pola investigación ye una obligación porque "namá al traviés de la conocencia vamos consiguir superar esta situación de crisis". Gotor recordó que la inversión nel nuesu sistema d'educación cimera tien un efectu multiplicador y qu'España tien unu de los sistemes científicos más granibles del mundu. "Tenemos De buscar salíes por que la investigación nun se pare, nun recule y nun perdamos tou lo que ganemos a lo llargo de los años con muncho esfuerzu", indicó.

El director xeneral d'Investigación Científica y Técnica destacó'l sellu de Campus d'Excelencia Internacional que tien la Universidá d'Uviéu, y recordó que "ensin conocencia nun hai nada, y la conocencia empieza nos llaboratorios". Juan María Vázquez esplicó tamién delles llínees claves de la Estratexa Española de Ciencia y Tecnoloxía aprobada la pasada selmana y del Plan Nacional.

Na ceremonia d'entrega del premiu intervinieron tamién la directora xeneral d'Universidaes ya Investigación, Miriam Cueto, y el presidente d'Illas-Reny Picot y patronu de la Fundación Valdés-Salas, Francisco Rodríguez. L'actu cuntó cola presencia de numberoses autoridaes del ámbitu políticu, social y empresarial d'Asturies.

Esti premiu en Biomedicina Aplicada ta promovido pola Fundación Valdés-Salas y les empreses farmacéutiques Bayer y Cofas. Esti galardón busca reconocer una investigación que fuera utilizada con ésitu por una empresa, premiando asina la collaboración estrecha ente'l mundu empresarial y el científicu pa llograr una mayor eficiencia nos procesos de producción de productos yá esistentes o bien nel desenvolvimientu d'otros nuevos.