El director conservador del Muséu de Xeoloxía de la Universidá d'Uviéu, Luis Miguel Rodríguez Terente, llogró'l Premiu SOGEAS 2022 a la divulgación de la xeoloxía. El xuráu destacó'l llabor realizáu por Terente y los sos más de trés décades dedicáu al espardimientu de la investigación en Ciencies de la Tierra. L'acta reconoz, ente otros valores, la so aportación significativa nel pensamientu de la sociedá asturiana por que se consideren los aspeutos xeolóxicos como factores cruciales a efectos de desenvolvimientu socioeconómico y de competitividá.

 

Los miembros que formaron parte del xuráu del galardón son César Caseru Fernández, en representación de la Sociedá Xeolóxica Asturiana (SOGEAS), en calidá de presidente; Juan Bahamonde Rionda, en nome de la Facultá de Xeoloxía, y Luis Fernández Muñoz, en representación del Colexu Oficial de Xeólogos na so delegación n'Asturies (ICOG-Asturies).

 

Na decisión del xuráu, que se tomó por unanimidá, los sos miembros destaquen tamién el llabor de Terente en favor de la divulgación de la conocencia xeolóxica y mineru del territoriu, de los sos recursos paisaxísticos, xeomorfolóxicos, paleontolóxicos, mineros y hídricos, según del restu de los estudios enmarcaos dientro de la Ciencies de la Tierra. 

 

Trayectoria profesional

Terente ye llicenciáu (1997) y doctor en Xeoloxía pola Universidá d'Uviéu (2007), xemólogu pola Universidá de Barcelona (2004), y realizó estudios de Posgráu en Museoloxía Científica, Marketing y Técniques de Comunicación pola Universidá de Valencia (2009). 

 

La so actividá profesional centróse nel Departamentu de Xeoloxía de la Universidá d'Uviéu, onde foi profesor de Cristalografía, Mineraloxía y Cristaloquímica, amás de participar nel Máster Universitariu en Recursos Xeolóxicos ya Inxeniería Xeolóxica, ya impartir diversos cursos formativos. 

 

En 2001, ocupó'l puestu de conservador del Muséu de Xeoloxía de la universidá asturiana y, en 2009, foi nomáu director-conservador. Ye responsable tantu de los materiales xeolóxicos espuestos y almacenaos como de los llabores de divulgación de los sos conteníos. 

 

Pertenez a diverses asociaciones, ente les que tán ICOM España (Conseyu Internacional de Museos) y SMMP (Society of Mineral Museum Professionals), y perteneció a la xunta directiva de l'Asociación Profesional de Museólogos d'España (APME) mientres el periodu 2010-2016.

 

Ye autor de mediu centenar d'artículos científicos y divulgativos y d'otres tantes conferencies rellacionaes cola xeoloxía, la mineraloxía y l'hestoria de la minería rexonal, amás de los meteoritos. Ente les sos publicaciones, destaca la coautoría del llibru "La Fluorita. Un sieglu de minería n'Asturies".