Una investigación, na que participó la Universidá d'Uviéu, punxo de relieve cómo'l cambéu climáticu pue afectar a la tasa d'avieyamientu de los animales, en concretu de los que nun pueden regular la so temperatura corporal, como los anfibios, insectos, peces y reptiles (los animales "ectotermos", que son toos sacante les aves y los mamíferos). L'artículu, espublizáu en Global Change Biology, tien como autores a Germán Orizaola, del Institutu Mistu d'Investigación en Biodiversidá (Universidá d'Uviéu-CSIC-Principáu d'Asturies), con llar nel Campus de Mieres, y los investigadores de la Universidá de Glasgow Pablo Burraco, Pat Monaghan y Neil Metcalfe.

Magar que l'efectu de la temperatura sobre la fisioloxía de los animales estudióse con detalle, hasta agora nun s'emprestara atención al efectu qu'estos cambios fisiolóxicos pueden tener sobre l'avieyamientu de los organismos. Nel artículu descríbese cómo un aumentu de temperatura va trayer una mayor tasa de crecedera nestos organismos, lo que va alteriar la so fisioloxía, aumentando los niveles d'estrés oxidativu. De la mesma, esto va impactar sobre los telómeros, estructures que s'asitien nos estremos de los cromosomes y que tienen por función da-y estabilidá a la célula y torgar que rexones codificantes d'ADN se pierdan na dixebra celular. A mayor velocidá de crecedera y mayor estrés oxidativu, mayor ye la tasa de degradación d'estos telómeros y más rápido lleguen a la muerte celular. D'ende que los telómeros s'usen como indicadores d'avieyamientu celular en munchos organismos. Por tanto, nel artículu establez la rellación directa ente cambiu climáticu, velocidá de crecedera, estrés oxidativu, perda de telómeros y avieyamientu. 

El profesor Germán Orizaola señala que "cualesquier acurtiamientu de la esperanza de vida de los animales va menguar el so potencial de reproducción, daqué que podría producir impactos directos en munches especies y poblaciones, especialmente si yá s'atopen afectaes por cualesquier otru factor".

Per otru llau, los investigadores faen una llamada d'atención sobre la necesidá d'investigar más nesti campu, lo que ye güei inesploráu, y que podría tener consecuencies bien negatives pal caltenimientu de munches poblaciones animales, si se ven espuestes a una tasa d'avieyamientu más rápida. Germán Orizaola afirma que "considerar l'impactu que'l cambiu climáticu pue tener sobro l'avieyamientu de les especies va ser imprescindible pa establecer programes afayadizos de caltenimientu, manexu y esplotación de la fauna salvaxe".