Noticias

  • La Universidá d'Uviéu visibiliza les cares de la ciencia n'una esposición con 150 billetes y monedes

    06 de Mayu 2021

    "Les cares de la ciencia en 150 billetes y monedes" puede visitase hasta'l 30 de mayu na sala d'esposición del Edificiu Históricu de la Universidá | Hasta'l día de güei, los protagonistes de la ciencia apaecieron en solu unos pocos cientos de monedes y billetes de los varios miles de diseños qu'hubo y hai en circulación

    La Universidad de Oviedo visibiliza los rostros de la ciencia en una exposición con 150 billetes y monedas

    Visibilizar les aportaciones de los homes y muyeres que contribuyeron al desenvolvimientu de la investigación nel mundu. Este ye l'oxetivu de la esposición Les cares de la ciencia en 150 billetes y monedes que s'inauguró güei nel Edificiu Históricu de la Universidá d'Uviéu y que va poder visitase hasta'l 30 de mayu. L'apertura de l'amuesa cuntó cola asistencia de los vicerrectores d'Investigación y Estensión Universitaria y Proyección Cultural, Antonio Fueyo y Carmen Adams, respectivamente, y del comisariu de la esposición, el profesor de Ciencies de la Educación José Manuel Montejo.

    Los vicerrectores destacaron que l'amuesa forma parte d'un oxetivu estratéxicu de la Universidá d'Uviéu que ye averar a la sociedá'l trabayu, de cutiu calláu, de los homes y muyeres que se dediquen a la investigación. La esposición ta formada por orixinales de la colección de la Universidá d'Uviéu y por reproducciones procedentes de 40 países.

    L'amuesa pon cara a un centenar personalidaes, namá 5 muyeres, que contribuyeron a la meyora científica. Ente estes muyeres, ocupa un llugar destacáu la imaxe de Florence Nightingale (1820-1910), considerada como la fundadora de la enfermería moderna, según la primer teórica del oficiu.

    El profesor José Manuel Montejo esplica que nos primeros billetes apaecía solamente la imaxe del investigador, mayoritariamente varones, pero non el so nome, de cuenta que la so cara permanecía anónimu pa la población xeneral. En casi tolos billetes más modernos, figura yá la filiación del investigador, inclusive les feches nes que vivió ya imaxes relatives a los sos afayos.

    Magar tou, según esplica'l comisariu de l'amuesa, hasta'l día de güei, los protagonistes de la ciencia apaecieron en solu unos pocos cientos de monedes y billetes de los varios miles de diseños distintos qu'hubo y hai en circulación. Ye ciertu, magar tou, qu'esta asignatura pindia ta aprobándose nos tiempos más recién.

    Como casu interesáu, nel añu 2018, el Bancu d'Inglaterra, cola conseña Think Science, dio la oportunidá a los ciudadanos británicos d'escoyer qué científicu o científica apaecería nun nuevu billete de 50 llibres. L'escoyíu por votación popular foi'l matemáticu Alan Turing (1912-1954), consideráu unu de los padres de la computación y de la intelixencia artificial. El billete va entrar en circulación el próximu 23 de xunu, coincidiendo cola fecha de la so nacencia.

    20 años de divulgación científica

    El Vicerrectorado d'Investigación de la Universidá d'Uviéu, al traviés de la so Unidá de Cultura Científica y de la Innovación (UCC+i), y en collaboración col Ministeriu de Ciencia ya Innovación al traviés de la Fundación Española pa la Ciencia y la Tecnoloxía (FECYT), celebren con esta esposición les sos 20 años d'impulsu a la divulgación científica. L'amuesa Les cares de la ciencia en 150 monedes y billetes puede visitase nel Edificiu Históricu de la Universidá d'Uviéu dende'l 6 al 30 de mayu, de llunes a vienres y n'horariu de 11:00 a 14:00 hores y de 17:00 a 20:00 hores. Tamién va poder visitase los sábados, de 10:00 a 19:30 hores y los domingos de 10:30 a 14:30 hores.

    Esposición: Les cares de la ciencia en 150 monedes y billetes

    Lugar: Sala d'Esposición del Edificiu Históricu de la Universidá d'Uviéu.

    Feches: del 6 al 30 de mayu.

    Horarios: de llunes a vienres, de 11:00 a 14:00 hores y de 17:00 a 20:00 hores. Sábados, de 10:00 a 19:30 hores- Domingo, de 10:30 a 14:30 hores.

     

    Imaxes:



Buscar