El Grupu 9 d'Universidaes (G-9) aceptó 557 solicitúes nel novedosu Plan online de Formación del Profesoráu Universitariu Novel qu'arrinca güei. Esta iniciativa ta en sintonía col artículu 78 de la Llei Orgánica del Sistema Universitariu (LOSU) y encamienta al profesoráu ayudante doctor de nuevu ingresu a cursar formación pedagóxica inicial. La ufierta formativa cuenta con 18 cursos y entámase en redol a cuatro categoríes: formación para formadores online, metodoloxía para la educación dixital, materiales y recursos educativos dixitales y evaluación para l'aprendizaxe.

En concretu, güei dan empiezu trés cursos de la ufierta: Aplicación del aprendizaxe basáu en problemes na docencia universitaria, de la Universidá de Castiella La Mancha; Diseñar y planiar pa tolos estudiantes universitarios dende la educación inclusiva, de la Universidá de Murcia ya Introducción a la innovación educativa na docencia universitaria de la Universidá d'Uviéu. Y asina se van dir asocediendo hasta impartir los 18 cursos qu'integren el plan. D'esta manera, l'alumnáu va poder realizar dos cursos de 1 ECTS o bien un únicu cursu de 2 ECTS y llograr el posterior certificáu. 

Refuerzu del marcu educativu

Esti plan formativu va buscar incentivar les habilidaes del profesoráu novel y fortalecer pontes ente les universidaes miembru del Grupu 9. Esta collaboración va reforzar el marcu educativu universitariu, aprovechando la tecnoloxía y los recursos compartíos de les universidaes participantes p'alzar la calidá de la educación cimera. Coles mesmes, el proyectu reflexa'l compromisu del G-9 cola innovación y la formación continua, garantizando que los y les docentes cunten con toles ferramientes y recursos necesarios pa ufiertar una educación actualizada y de vanguardia.