La Xunta de Colonies Escolares hai licitado les obres d'afitamientu del edificiu de Colonies Escolares de Salinas, nel conceyu de Castrillón, por 441.048,67 euros. La empresa axudicataria foi Elecnor Servicios y Proyectos S.A.O., que va tener un plazu de seis meses y mediu pa llevar a cabu unos trabayos que frenen el deterioru del inmueble y el consecuente peligru de derrumbe que causó'l pasu del tiempu y el continuu vandalismo del que ye oxetu.

Esta primer fase axudícase dempués de que'l pasáu añu la llicitación de les obres de rehabilitación quedara erma, lo qu'obligó a la Xunta a replantegar les obres debíu a la medría del costu nos materiales de construcción. Nesti sentíu, cabo recordar que los recursos de l'Asociación Xunta de Colonies Escolares son llindaos, lo que torga sufragar unes obres de gran magnitú. 

Una vegada replantegada la rehabilitación del inmueble, el pasáu mes de payares la Xunta de Colonies Escolares sacó a llicitación les obres d'afitamientu con un presupuestu base de 533.668 euros, que foi ameyoráu pola empresa axudicataria. 

Estes obres son el puntu de partida de la rehabilitación del edificiu y van venir siguíes de distintes intervenciones que rematen cola recuperación completa de la finca, siguiendo, sía que non, los requerimientos a los que s'atopa suxetu al tratase d'un bien incluyíu nel Inventariu del Patrimoniu Cultural d'Asturies. 

Dende l'entamu del proyectu, la Universidá d'Uviéu y el Conceyu de Castrillón, instituciones que formen parte de la Xunta de Colonies al traviés de los sos representantes, trabayaron conjuntamente pa recuperar l'emblemáticu edificiu. El rector de la Universidá d'Uviéu y presidente de l'Asociación Xunta de Colonies Escolares, Ignacio Villaverde, celebró qu'esta axudicación supon “un pasu más pa dignificar esti emblemáticu edificiu y que pueda tener un nuevu usu”. Pela so parte, l'alcalde de Castrillón, Eloy Alonso, amosóse satisfechu pola meyora de "un proyectu bien importante para'l conceyu".

La hestoria de les Colonies Escolares de Salinas ta bien amestada a la Universidá d'Uviéu, por ser dellos profesores de la institución académica el precursores de la idea, y a Castrillón, al escoyer aquellos l'arenal de Salinas pa construyir l'edificiu, pol que pasaron neños y neñes de dellos conceyos d'Asturies mientres los branos de 1914 a 1984. Ellí esfrutaben d'un llugar sele y de un modelu pedagóxicu amestáu a la llibre enseñanza.