Noticias

  • La Universidá d'Uviéu y la Fundación Escuela de Mareo Real Sporting de Xixón van collaborar en proyectos educativos y n'investigación

    28 de Payares 2017

    El rector Santiago García Granda y el presidente del club, Javier Fernández, roblaron un conveniu marco nel Edificiu Históricu

    Por la izquierda, Juan Carlos Ablanedo, Enrique Castro Quini, Germán Robles, el rector Santiago García Granda, Javier Fernández, Fernando Losada, Ramón de Santiago y Xabiel García Pañeda.
    El rector de la Universidá d'Uviéu, Santiago García Granda, y el presidente del Real Sporting de Xixón, Javier Fernández, roblaron esti mediudía, na Sala de prensa del Edificiu Históricu (Uviéu/Uviéu), un conveniu marco de collaboración ente la institución académica asturiana y la Fundación Escuela de Mareo del club raxón, que va dexar desenvolver acciones conxuntes en formación, investigación ya innovación.
     
    Nel intre del actu, el Rector recordó que la Universidá d'Uviéu quier "fomentar la práctica deportiva y concenciar a la comunidá universitaria sobro los vezos saludables y de la meyora de la calidá de vida. Tamién nos interesa la divulgación y l'investigación y tolo que tenga que ver col deporte y los sos valores. Y por eso damos importancia a esta collaboración qu'empecipiamos agora, porque compartimos intereses y principios, y queremos trabayar, cada unu nel so ámbitu, apurriendo lo meyor de dambes instituciones".
     
    Santiago García Granda amosó'l so "prestu" por roblar esti conveniu que dexe programar distintes actividaes añalmente, y que puede tomar "dende la implementación de proyectos educativos, como posgrados o títulos propios que tengan que ver col deporte, pero tamién la investigación y l'innovación. Amás, va poder haber proyectos de collaboración con otres universidaes", indicó.
     
    Pela so parte, Javier Fernández señaló que "güei ye un día d'estraordinaria importancia pa la Fundación, ye un honor roblar esti alcuerdu y tender pontes pa trabayar xuníos pola excelencia. La Universidá d'Uviéu ye xuna magnífica referencia nel mundu de la que toos nos sentimos arguyosos". El presidente del club destacó "como primer gran proyectu, Mareo Education & Research Lab, un centru d'investigación diseñáu pa tresformar el mundu del fútbol al traviés de la excelencia deportiva, la conocencia y l'innovación. El compromisu del Club y de la Fundación pasa por construyir, con sofitu de la Universidá d'Uviéu, un centru de referencia internacional a partir de la metodoloxía y el modelu de formación y filosofía de Mareo".
     
    Na firma del alcuerdu tamién tuvieron presentes el delegáu de Coordinación y Estratexa Universitaria de la Universidá d'Uviéu, Xabiel García Pañeda; el director de la Fundación, Germán Carbayos; el conseyeru del club raxón, Fernando Losada; l'abogáu de la entidá, Ramón de Santiago; y los exjugadores Enrique Capo "Quini" y Juan Carlos Ablanedo.
     

    Imaxes:


Buscar