template-browser-not-supported

Becas y ayudas

Un estensu catálogu de beques y ayudes pal estudiantáu

Los universitarios disponen de distintes beques y ayudes pa sofitar los sos estudios. El catálogu ye ampliu y va dende'l pagu de la matrícula hasta material, desplazamientos, residencia o movilidá nacional ya internacional.

Amás de la convocatoria de beques de calter xeneral y de movilidá del Ministeriu d'Educación y Formación Profesional, qu'inclúi beques de matrícula, material, desplazamientu, residencia o proyectu fin de carrera, la Universidá d'Uviéu destina una parte importante del so presupuestu a beques y ayudes al estudiante.

Esti programa propiu de la institución académica representa ún de los preseos que contribúi a facer posible'l principiu d'igualdá d'oportunidaes nel exerciciu del derechu a la educación recoyíu na Constitución. Los oxetivos persiguíos pol programa son los siguientes:

  • Garantizar l'accesu a la educación universitaria a toos aquellos estudiantes qu'escarezan de los recursos económicos necesarios y verifiquen determinaos requisitos académicos.
  • Facilitar l'accesu a la formación universitaria y el desendolcu de los sos estudios en condiciones d'igualdá a estudiantes con discapacidá.
  • Sofitar económicamente a estudiantes con dificultaes económiques d'urxente necesidá derivaes de circunstancies personales/familiares sobreveníes con posterioridá al entamu del cursu académicu.
  • Completar la formación de los alumnos por aciu de la convocatoria de beques de collaboración en distintos servicios universitarios y la realización de práctiques n'empreses ya instituciones que faciliten la so incorporación al mundu llaboral n’acabando los sos estudios.
  • Fomentar la participación estudiantil nos distintos ámbitos universitarios.

Tanto los programes nacionales como los propios de la Universidá d'Uviéu inclúin ayudes pa graos, másteres universitarios, doctoráu y títulos propios. Amás, delles convocatories específiques pretenden incentivar el deporte y la escelencia académica.

La Universidá d'Uviéu dispón tamién d'un programa específicu de beques de collaboración pa que los estudiantes compatibilicen los sos estudios con un serviciu en vicerrectoraos, centros, departamentos, institutos y servicios universitarios.