Caltenibilidá

Enfotada nel so compromisu col mediu ambiente, la Universidá d'Uviéu fai tamién actuaciones empobinaes al afalamientu del tresporte caltenible dientro de la comunidá universitaria, sobre manera l'usu de la bicicleta.

L'alcuerdu algamáu col Conceyu de Xixón fixo posible que'l carril bici llegare al campus universitariu. Mientres, n'Uviéu, pola mor del proyeutu SUMOBIS afaláu pol consistoriu, punxéronse nuevos aparcabicis n'estremaos asitiamientos universitarios.

L'afalamientu del usu de la bicicleta, la instalación de lletrolineres o l'inxerimientu de la cláusula de compra verde nos pliegos de contratación son dalgunos apuestes pola movilidá caltenible dientro de los campus

Col lema, Fai por desplazate pel campus en bici la Universidá y el conceyu d'Uviéu afalaron tamién el Plan 30 Uviéu: Ciudá y Universidá abiertes a la bicicleta, que naguaba por esparder l'emplegu d'esti tresporte nel centru urbanu.

La Universidá inxirió nos pliegos de los distintos servicios esternos, cláusules de compra verde que fixeron vidable la utilización d'un bon númberu de vehículos llétricos per parte del personal de les empreses axudicataries nes xeres propies del serviciu.

Arriendes d'ello, dientro de la Milla del Conocimientu en Xixón, la institución académica collaboró na instalación de lletrolineres, puntos de repostax pa esta clas de vehículos.