Caltenibilidá

Enerxía más llimpio, aforru enerxéticu, xestión prestamosa de los recursos y consumu responsable son los pegollos nos que s’afita’l plan d’aforru enerxéticu y caltenibilidá de la Universidá d’Uviéu

La Universidá d'Uviéu acoyó estremaes midíes pa dar seguranza del desendolcu de les sos funciones como institución docente ya investigadora en paralelu a una caltenida merma de la so Buelga Ecolóxica. En 2009 entamó un plan d'aforru enerxéticu y caltenibilidá reforciáu dempués dientro del Campus d'Escelencia Internacional. Ente otres actuaciones rescamplen:

La Universidá d'Uviéu punxo en dalgunos campus aparcadorios pa bicicletes y cargadores de vehículos llétricos p'afalar l'usu d'esta clas de tresporte non contaminante

  • El desaniciu de sistemes de calefaición altamente contaminantes.
  • La implantación d'un Sistema de Información Enerxética, SIE, (que controla en tiempu real el consumu de lletricidá, agua y gas).
  • Instalación d'un Sistema de Control d'Instalaciones, SCI, que se val les modernes teunoloxíes de control pa satisfacer les necesidaes de confort de los usuarios (climatización ya illuminación) coles mínimes demandes posibles de los estremaos recursos.
  • La meyora de la eficiencia de los sistemes d'allumáu, sustitución de lluminaries tradicionales por modernos sistemes d'alta eficiencia y llarga vida útil (allumáu LED y fluorescencia d'alta frecuencia), como tamién la sectorización de circuitos, deteutores de presencia, reguladores de fluxu, interruptores horarios y otros dispositivos que la teunoloxía de güei pon al nuesu algame.
  • L'adopción d'un completu sistema de xestión de restos.

La lletricidá y el gas natural son les principales fontes d'enerxía tradicional emplegaes güei nes instalaciones universitaries. La contribución de les enerxíes anovables a esti conxuntu enerxéticu ye, per agora, puntual: como la planta fotovoltaica coneutada a rede nel Campus de Mieres, o con finalidaes formatives y d'investigación, como la planta fotovoltaica aisllada y el colector solar del Campus de Xixón.

Una de les caberes actuaciones nel usu d'enerxíes alternatives allúgase nel Edificiu d'Investigación y la Residencia d'Estudiantes del Campus de Mieres, onde un sistema de climatización, nel primeru, y calefaición, nel segundu, funcionen col aprovechamientu xeotérmicu del agua de mina del Pozu Barreo (la bocamina alcuéntrase dientro del propiu campus).

La Universidá d'Uviéu collabora con otres instituciones, como los conceyos d'Uviéu y Xixón, en campañes d'afalamientu al usu de la bicicleta nos desplazamientos pelos campus o l'emplegu de vehículos llétricos y l'amenorgamientu d'emisiones de CO2.

Como sofitu a esta clas de midíes, la institución académica iguó una Oficina de la Bicicleta: un apartáu web que recueye esperiencies y datos sobro l'usu d'esti vehículu. Arriendes d'ello, fíxose la instalación de ‘aparcabicis' en dalgunos campus del centru de la ciudá o de lletrolineres pa recarga de vehículos nel campus de Xixón.

Náguase, en definitiva, non solo por un aforru enerxéticu y económicu, sinón pol espardimientu ente la comunidá universitaria de la cultura del consumu responsable. Poro, fáense campañes d'afalamientu del aforru enerxéticu empobinaes tanto a meyorar la concienciación de los usuarios nesta materia, como a dar a los mesmos conocimientos sobro bones práutiques nel usu de les instalaciones.

El finxu de la Universidá d'Uviéu ye participar activamente na llucha global escontra les consecuencies del cambéu climáticu. Pa ello, collabora coles polítiques de la Xunión Europea sobro amenorgamientu d'emisiones de gases d'efeutu ivernaderu de los estaos miembros, lo mesmo que colos principales oxetivos del Programa Impautu Académicu de la ONX, del que forma parte.