Espaciu solidariu

L'Espaciu Solidariu de la Universidá d'Uviéu lleva alantre delles xeres de sensibilización y sofitu a persones y coleutivos desfavorecíos, tanto dientro como fuera de los estremaos campus universitarios. Esta clas d'iniciatives faise davezu en collaboración con dixebraes organizaciones sociales ya instituciones.

Dende l'Espaciu Solidariu desendólquense aiciones p'afalar la igualdá de xéneru, la participación en programes de responsabilidá social y voluntariáu o la sensibilización medioambiental. Tamién s'afala l'alderique sobro cuestiones estratéxiques en foros rellacionaos cola discapacidá o n'alcuentros como les Xornaes d'Educación al Desendolcu.

Los campus de la Universidá d'Uviéu son escenariu tamién de la campaña de Donación de Sangre, del mercáu de comerciu xustu o de los cursos d'alfabetización d'inmigrantes. El sofitu a la tercer edá tamién tien una atención especial pente medies del programa Conviviendo y Compartiendo, una interesante iniciativa que pon en contautu a mozos de pocos recursos que precisen agospiamientu y mayores de 65 años que viven solos.

Dalgunes d'estes xeres fáense en collaboración con entidaes y asociaciones dedicaes a la cooperación en dellos ámbitos (Ayuda n'Aición, Fundación FAEDIS, Asociación d'Estudiantes de Medicina IFMSA, Asociación Cultural Iberoamericana Gacela, Fundación CAUCE, ACCEM-Asturies) o dientro de campañes de calter global (Múevite pola Igualdá, Día Mundial del Comerciu Xustu, Día Mundial ensin Tabacu, Plan de Drogues, etc.)