Grupu de Teatru

La Universidá d’Uviéu cunta con una importante cantera nel mundu de la escena. Una de les xeres con más éxitu ente los universitarios ye’l Grupu de Teatru, venceyáu al aula especializada que s’imparte tolos años y que dirixe’l dramaturgu asturianu Etelvino Vázquez.

El teatru ye una de les pieces clave de la ufierta cultural de la Universidá d'Uviéu. El Grupu de Teatru de la Universidá d'Uviéu (GTUU) compónse esclusivamente d'alumnos, que participen nos ciclos de teatru universitariu y faen actuaciones en teatros, cases de cultura y otres sedes, col procuru de la direición d'Etelvino Vázquez, ún de los nomes propios más representativos de la escena asturiana.

Al marxe de poner n'escena estremaos montaxes, el Grupu de Teatru de la Universidá d'Uviéu afala l'intercambiu con otres formaciones universitaries

Arriendes d'ello, el GTUU afala l'intercambiu con otres formaciones universitaries. El so llar asítiase nos baxos del Aulariu A del Campus d'Humanidaes y los sos componentes reciben una formación previa nel Aula de Teatru que cada añu entama'l Vicerrectoráu d'Estensión Universitaria y Comunicación.

L'Aula programa dos cursos. El primer cursu ye una aniciu práuticu al arte de representar, xesticular, declamar, remedar, movese… Ello ye, depriéndense los preseos imprescindibles p'actuar (l'usu del cuerpu, de la emoción y de la voz), al empar que les estremaes téuniques teatrales: Comedia del Arte, teatru oriental, improvisación, etc.; tamién se trabaya l'usu de la pallabra como ferramienta indispensable pa cualesquier actor.

Nel segundu cursu faise una práutica actoral consistente nel montax d'un espectáculu. Colos integrantes d'esta etapa iguaráse'l Grupu de Teatru de la Universidá d'Uviéu. A lo cabero del cursu, l'alumnu matriculáu na Universidá d'Uviéu al que se-y acreitare una participación de pelo menos un 90% de les hores fixaes podrá convalidar la so participación nel Aula por 4 Creitos de Llibre Configuración o por 3 Creitos ECTS.

La ufierta teatral de la Universidá d'Uviéu compleméntase con ciclos como La escena contemporánea, en collaboración col Conceyu d'Uviéu, y La escena ambulante, que ponen sobro les tables dellos de los meyores montaxes estatales actuales y el teatru fechu n'Asturies. Toles representaciones entamaes dende la Estensión Universitaria son gratuites y abiertes a tola sociedá..