Agospiamientu

Les posibilidaes d’agospiamientu pa los estudiantes de la Universidá d’Uviéu son abondes y axustaes a estremaos presupuestos y estilos de vida. Una comunidá pequeña como Asturies ufierta a los sos universitarios una calidá de vida d’altor y un costu d’agospiamientu y mantención más accesibles que’l de les grandes ciudaes.

Colexos mayores y Residencies

La Universidá d'Uviéu pon a disposición de los sos estudiantes dos escepcionales colexos mayores y residencies pa llograr una estancia cómoda y dafechu integrada na vida universitaria.

N'Uviéu, nel Campus de el Catalanes tán allugaos el Colexu Mayor San Gregorio y el Colexo Mayor América. Dambos tán asitiaos nuna redolada privilexada dotáu d'amplies zones verdes frente al Parque d'Iviernu, y coles instalaciones deportives universitaries amiestes, amás de cercanos al cascu históricu de la ciudá. Los colexos Mayores ufierten el meyor agospiamientu con serviciu de llimpieza, mantención, conexón Wi-Fi pa tolos miembros de la Comunidá Universitaria, según para estudiantes, profesores y personal de l'alministración y servicios d'otres Universidaes que pertenezan a eduroam.

Nel Campus de Mieres, la residencia universitaria ufierta un modernu agospiamientu, con 112 places n'habitaciones y estudios. L'edificiu, que cunta con servicios de biblioteca, sala d'informática, restorán autoserviciu y wifi en toles árees, ta allugáu al pie de les instalaciones de docencia, investigación y deportes del campus, a escasos minutos a cuerpu del centru de la ciudá y xustu frente a la so estación d'autobuses.

Pa pidir más información de Colexos Mayores y Residencies Universitaries puen empobinase al corréu electrónicu infocolegios@uniovi.es o llamar al teléfonu 985 10 41 49.

Centru d'Información de Vivienda al Estudiante

Un pisu d'arriendu ye una de les opciones más comunes pa los estudiantes. La Universidá d'Uviéu cunta con una plataforma propia de busca de vivienda (CIVE). Los alumnos a los que-yos pruya podrán acceder a ella pa consultar la ufierta de pisos n'arriendu nes estremaes ciudaes asturianes, acutando les sos busques en función del llugar, el grandor o'l preciu. El CIVE recueye la ufierta inmobiliaria de particulares qu'arrienden les sos viviendes y tamién ufre la posibilidá d'atopar compañeros pa compartir pisu o atopar simplemente un cuartu nun pisu yá arrendáu por otros estudiantes. Cada cursu'l CIVE xestiona más de milenta consultes p'atopar o ufiertar un agospiamientu pa los alumnos de la Universidá.

Agospiamientu pa estudiantes estranxeros

Programa d'agospiamientu en families pa estudiantes estranxeros

Mudase a otru país ye un cambéu dafechu de rodiu y vezos. Los estudiantes estranxeros de la Universidá d'Uviéu tienen la opción de ser acoyíos por una familia asturiana na so estancia n'España. La Oficina d'Atención al Estudiante Internacional facilita conseyu al alumnu demandante d'agospiamientu.

Ufierta d'arriendu de pisos o habitaciones

Los siguientes llistaos recueyen una serie d'inmuebles qu'ufierten la posibilidá d'arriendu directu per parte de los estudiantes estranxeros de la Universidá. Cada llistáu reseña de volao les condiciones esenciales de les ufiertes (allugamientu, requisitos d'almisión, preciu per habitación o pol pisu completu, teléfonu de contactu). Tratase de vivendes asitiaes en tres zones distintes d'Uviéu:

Otres opciones

Amás de les opciones anteriores, diferentes instituciones y conceyos cunten con opciones específiques d'agospiamientu pa estudiantes, como Fundoma o'l Conceyu de Xixón. Nesti casu caberu, el conceyu ufierta delles opciones y ayudes pal agospiamientu, sobre manera pa estancies de llarga duración.

Enllaces rellacionaos