Unidá d’Igualdá

La Universidá d’Uviéu entamó en 2010 la Unidá d’Igualdá, col envís de desendolcar polítiques efeutives que miren pola igualdá d’oportunidaes ente homes y muyeres. Llueu de dos años, finó’l primer Plan d’Igualdá de la institución académica.

La Unidá d'Igualdá actúa en tolos ámbitos como elementu tresversal de les polítiques universitaries. Amás de participar activamente en campañes a la escontra la violencia de xéneru, el llinguax non sexista o l'acosu, mira por que se cumpla la normativa en materia de salú llaboral, igualdá d'oportunidaes o conciliación familiar.

La Universidá d'Uviéu, en cumplimientu y execución d'una de les exes y oxetivos del Campus d'Escelencia Internacional y acordies coles disposiciones de la Llei Orgánica 3/2007 pa la igualdá efeutiva ente muyeres y homes, lo mesmo que la propia Llei Orgánica d'Universidaes, emprimó nel entamu del cursu 2010-2011 a inxertar la perspeutiva de xéneru nes sos polítiques universitaries.

Una de les principales aiciones desendolcaes pola Unidá d'Igualdá foi la ellaboración del Plan d'Igualdá de la Universidá d'Uviéu, un proyeutu consensuáu pola comisión d'igualdá y col preste del Conseyu de Gobiern del 4 de xineru de 2013. Esti plan tien como puntu de partida'l Proyeutu Xéneru ya Igualdá na Universidá d'Uviéu (XENIUNIUVI), un trabayu d'investigación pioneru que valió de referencia ente los investigadores.

Les xeres de la Unidá d'Igualdá desendólcales l'Área d'Empleabilidá, Responsabilidá Social ya Igualdá, venceyada al Vicerrectoráu de Planificación Económica, Convenios y Contratos.

Oxetivos de la Unidá d'Igualdá

  • Mirar pol cumplimientu de les lleis d'Igualdá y, en xeneral, pola aplicación efeutiva del principiu d'igualdá nos ámbitos alministrativu, docente y llaboral.
  • Informar sobro la normativa de la Universidá y los procedimientos con incidencia na igualdá de xéneru y oportunidaes.
  • Informar y aconseyar a los muérganos de gobiernu y comisiones de la Universidá en materia de polítiques d'igualdá y nel cumplimientu del principiu d'igualdá d'oportunidaes ente muyeres y homes.
  • Afalar campañes de sensibilización, formación ya información pa tola comunidá universitaria.
  • Afalar la enseñanza ya la investigación al rodiu de la igualdá ente muyeres y homes.
  • Ellaborar ya implantar los Planes d'Igualdá de la Universidá, nos que se fixen los oxetivos, les estratexes o les midíes a adoptar pal llogru d'esa igualdá.
  • Esparder les xeres que se lleven alantre en materia d'igualdá na Universidá d'Uviéu.
Contautu:
igualdad@uniovi.es