Galería Virtual de la Universidá d’Uviéu (GAUDEU)

La galería virtual GAUDEU ye un proyeutu cultural que quier esparder y facer accesible’l patrimoniu históricu y artísticu algamáu pola Universidá d’Uviéu a lo llargo de los sos más de 400 años d’historia. Esti proyeutu anovador ufierta una completa visita virtual en 360 graos, una galería d’arte con imáxenes n’alta definición y fiches d’al rodiu d’un centenar de pieces y una biblioteca dixital con incunables y exemplares únicos.

GAUDEU ye un ambiciosu proyeutu, pioneru nel ámbitu universitariu español, qu'amiesta anovamientu y cultura. Inauguróse en febreru de 2012 y afalóse dende'l Vicerrectoráu d'Estensión Universitaria y Comunicación, cola collaboración de los vicerrectoraos de Campus, Informática ya Infraestructures, y d'Investigación y Campus d'Escelencia Internacional.

L'equipu de profesionales usó teunoloxía de vanguardia, como l'emplegu d'un oxetivu especial viniente de Xapón que dexa facer una visita en 360 graos. GAUDEU ta disponible en versión billingüe (español-inglés) lo que facilita'l so espardimientu internacional.

Qué ufierta GAUDEU

La galería tien obres d'estremaos estilos, dómines y autores. El percorríu inclúi, ente otres, pieces del retablu fundacional de la Universidá de 1607, una obra en depósitu del Muséu del Prado, el Cristu presentáu al Pueblu, dos tables de Rubio Camín de temática relixosa, 9 vidreres del edificiu y la galería de retratos de rectores con obres d'artistes como Paulino Vicente y Joaquín Vaquero Turcios.

Cómo funciona

GAUDEU amiesta dos opciones pal visitante: Gaudeu Ars y Gaudeu Lapis. La primera d'elles inxer una galería fotográfica d'obres asitiaes en diferentes llugares del Edificiu Históricu y del Edificiu Rectoráu (vieyu Colexu de Recoletes). La esbilla de pieces inclúi pintures y obres gráfiques, escultures, pieces de moblame y otros oxetos.

Arriendes d'ello, amiesta obres dixitalizaes de la Bibioteca de la Universidá d'Uviéu: una d'elles, de la talla d'El Baladro del Sabio Merlín, únicu exemplar conocíu d'un incunable impresu en Burgos en 1498. Munches de les obres nun tán accesibles al públicu. Gaudeu Ars tomó como modelu pa la so ellaboración les galeríes virtuales de dalgunes de les instituciones artístiques de referencia nel mundu como El Prado o El Louvre.

El nomáu fotógrafu asturianu José Ferrero foi l'encargáu de captar les imáxenes qu'amuesen con máxima resolución los detalles de cada obra, que ta acompañada d'una detallada ficha téunica. Amás, nel casu de les escultures l'aplicación dexa ver una imaxe rotatoria pa güeyar la pieza dende toles perspeutives.

Un paséu pel Edificiu Históricu

La visita virtual que propón Gaudeu Lapis percuerre les principales estancies del Edificiu Históricu de la Universidá con una perspeutiva de 360 graos. El visitante podrá remanar los mandos pa escoyer el so percorríu per tol edificiu. El paséu virtual pela sede histórica de la Universidá desanubre dalgunos requexos singulares, davezu pesllaos al públicu. Ye'l casu de la torre, dende la que s'acolumbra una perbona panorámica d'Uviéu. Cuando l'usuariu va entrando en caún de los cuartos atopará les indicaciones p'acceder a la ficha y a la galería de les obres d'arte más destacaes del llugar.