Una güeyada xeneral

La Universidá d'Uviéu ye una institución con una centenaria trayeutoria de docencia, investigación y compromisu cola sociedá. Ye una universidá inxerta nel so ámbitu territorial, que trabaya pola meyora de la calidá docente, la escelencia na investigación y el progresu económicu y social del so rodiu.

Distinguida pol Ministeriu d'Educación como Campus d'Escelencia Internacional en 2009, los indicadores en docencia, investigación ya internacionalización de la Universidá d'Uviéu afiten la so posición dientro del sistema español y européu. Nos caberos años, la institución académica asturiana enanchó la so proyeición internacional y tamién la so presencia na sociedá asturiana, como motor non solo de la investigación sinón tamién de l'actividá cultural na comunidá.

La institución académica asturiana destaca tamién pol so compromisu cola tresformación del texíu productivo de la comunidá, per aciu del desendolcu d'una I+D+i cimera y la tresferencia de conocimientu hacia la empresa.

Dientro de la so implicación col rodiu territorial, la Universidá d'Uviéu afala dixebraes iniciatives de sofitu a les persones con necesidaes específiques, aiciones de voluntariáu, cooperación al desendolcu, polítiques d'igualdá de xéneru y conciliación familiar. Cada añu fai una memoria de Responsabilidá Social Universitaria au se recueyen toles iniciatives.

Ente los finxos de la Universidá d'Uviéu alcuéntrense:

  • La creación, desendolcu, tresmisión y crítica de la ciencia, la téunica y la cultura.
  • La preparación pal exerciciu de xeres profesionales qu'esixan l'aplicación de conocimientos y métodos científicos y téunicos, lo mesmo que pa la creación artística.
  • La especialización científica, profesional y artística de doctoráu y posgráu.
  • L'espardimientu social de la ciencia, la téunica y la cultura per aciu de les xeres d'estensión universitaria y de la formación de les persones a lo llargo de tola vida.
  • El sofitu científicu y téunicu al desendolcu cultural, social y económicu, lo mesmo que la preservación, caltenimientu y meyora del mediu ambiente.
  • L'afalamientu de les xeres culturales, deportives y sociales de la comunidá universitaria.
  • La contribución a la formación de ciudadanos llibres, afalando una actitú crítica y participativa na Universidá y na sociedá.
  • La defensa y potenciación del alderique pacíficu y del respetu mutuu como formes de rellación ente los pueblos.