Una güeyada xeneral

La Universidá d'Uviéu ye una institución con más de 400 años d'historia, comprometida cola sociedá y estrechamente venceyada al so territoriu. Somos la única universidá pública nel Principáu d'Asturies, una comunidá autónoma con un bayurosu patrimoniu cultural y un rodiu natural privilexáu.

Docencia de calidá y gran potencial investigador, con grupos qu'encabecen proyeutos internacionales, son dalgunes de les señes d'identidá de la Universidá d'Uviéu. Una institución qu'afala aiciones de responsabilidá social en toles estayes, con especial procuru nes polítiques d'igualdá, la empleabilidá de los sos titulaos, la caltenibilidá, la tresparencia y la eficiencia na xestión de los recursos.

Los nuesos estudiantes disponen d'una ufierta de graos en toles estayes de conocimientu, itinerarios billingües, dobles títulos y un ampliu catálogu de másteres universitarios internacionales y en collaboración cola empresa, al igual que programes de doctoráu con Mención hacia la Escelencia y una formación continuada atenta a la demanda social.

La Universidá d'Uviéu ye una de les nueve primeres universidaes que llograren l'acreitación como Campus d'Escelencia Internacional en 2009, con un proyeutu al que s'amestaron más de 300 instituciones y empreses asturianes. Les polítiques d'internacionalización, con programes de movilidá pa estudiantes, profesores y personal d'alministración y servicios, y la tresferencia de conocimientu hacia'l sector empresarial formen parte de los nuesos finxos. Somos, en definitiva, una universidá moderna y calidable al serviciu de la sociedá.

Vicente Gotor Santamaría
Rector de la Universidá d'Uviéu.