template-browser-not-supported

Sobre nosotros

Sobre nosotros

Visión panorámica

La universidá d’Asturies

La Universidá d'Uviéu ye la institución pública d'educación superior y investigación del Principáu d'Asturies. Con más de 410 años d'historia, dispón d'una completa ufierta de graos lligaos al Espaciu Européu d'Educación Superior (EEES) en toles rames de conocimientu, itinerarios billingües, dobles titulaciones con universidaes internacionales y másteres Erasmus Mundus y interuniversitarios y en colaboración con más de 250 empreses. Esta ufierta formativa compleméntase con un completu programa de títulos propios y aules y cursos d'Estensión Universitaria.

Vocación internacional

La Universidá d'Uviéu cunta, dende l’empiezu, con una clara vocación internacional. Esta apuesta polo global dio los sos frutos en payares de 2009, cuando se convirtió n'una de les primeres instituciones académiques d'enseñanza superior españoles en consiguir l’acreditación de Campus d'Escelencia Internacional (CEI). El proyectu CEI Asturies-Ad Futurum, qu'axunta más de 300 instituciones, empreses y centros tecnolóxicos, consolidó'l so sellu d'escelencia y los sos oxetivos cola puesta en marcha del plan estratéxicu 2018-2022.

Les principales árees de conocimientu nes que cursen estudios los alumnos de la Universidá d'Uviéu son les siguientes:

  • Arte y Humanidaes.
  • Ciencies.
  • Ciencies de la Salú.
  • Ciencies Sociales y Xurídiques.
  • Inxeniería y Arquitectura.

La institución, en cifres

Dalgunes cifres ayuden a entender meyor l’ampliu potencial de la Universidá d’Uviéu:

  • 60 graos (3 dobles y 19 billingües).
  • 60 másteres universitarios.
  • 5 Másteres Erasmus Mundus.
  • 25 programes de doctoráu.
  • 63 títulos propios.
  • 17 facultaes y escueles.
  • 38 departamentos.
  • 21.000 estudiantes.
    • Más de 17.000 de Grau.
    • Más de 1.900 de Máster.
    • Más de 1.600 de Doctoráu.
  • 2.100 investigadores y docentes.
  • 1.000 trabayadores d’alministración y servicios.

Siete campus en tres ciudades

La docencia concéntrase en siete campus distribuyíos na exa central d'Asturies: Uviéu (El Cristu, Santuyano, Llamaquique, Los Catalanes y Uviéu-Centru), Xixón y Mieres. La universidá cunta amás con una bona ufierta de servicios universitarios n'Avilés. En 2010, llévase a cabu un ambiciosu plan de reordenación de centros, que foi puestu como exemplu de bones práctiques pa les universidaes españoles. La docencia impártese en 17 facultaes y escueles y dos centros adscritos. Amás, la Universidá d'Uviéu dispón d'un Centru Internacional de Posgráu (CIP) y una Escuela de Doctoráu que coordinen les enseñances de máster y doctoráu. La xestión d'estes enseñances de posgráu descentralizóse pa facilitar una atención más cercana al estudiantáu.

La institución académica dispón d'unes completes instalaciones deportives de llibre accesu pa la comunidá universitaria y modernos aloxamientos pa estudiantes, docentes y personal d'alministración y servicios. Ufierta un ampliu catálogu de cursos d'idiomes, al traviés de La Casa de la Llingües, servicios d'orientación al estudiantáu, atención a les persones con necesidaes especiales y asesoramientu na busca d'empléu.

Motor de la investigación rexonal

La Universidá d'Uviéu ye'l principal motor de la investigación n'Asturies. Desenvuelve'l 80% del I+D+i de la comunidá autónoma y dispón de servicios y equipamientos punteros pa facilitar la tresferencia de conocimientu hacia un texíu productivu. Los ingresos derivaos de la producción científica valórense en cerca de 40 millones d'euros añales y cunta con más de 500 contratos y/o acuerdos con empreses pa desenvolver proyectos d'investigación y tresferencia del conocimientu.

La institución universitaria asturiana lidera, amás, dos clústeres especializaos n'Enerxía, Medioambiente y Cambéu Climáticu, y en Biomedicina y Salú, que tán íntimamente conectaos colos parques tecnolóxicos rexonales y la rede sanitaria pública asturiana. Un tercer clúster, focalizado nes Ciencies Sociales y Humanidaes, tien por oxetu dinamizar la importante investigación que se lleva a cabu nestes árees tradicionalmente con menos visibilidá pública y permite asina superar el conceutu d'investigación de bata blanca.

Cerca de 2.000 persones dedíquense a la investigación na Universidá d'Uviéu y trabayen en 173 grupos acreditaos. Los grupos d'investigación reconocíos tán en constante aumentu y pasaron de los 21 de 2010 a los 173 del añu actual.

La Universidá d'Uviéu cunta amás con estructures específiques d’apoyu a la investigación. Son institutos y centros de temática bien variada que van dende les tecnoloxíes espaciales hasta les neurociencies, pasando pela biotecnoloxía o la oncoloxía. Estos institutos permiten compartir recursos y equipamientos por parte del personal investigador.

La institución académica, consciente de qu'una de les sos meyores tarxetes de presentación son los sos investigadores, cunta con un plan propiu d'ayudes qu'abre'l camín a los mozos y respuende poles iniciatives emerxentes de mayor talentu. Amás, el programa impulsa la internacionalización de la investigación fecha n'Asturies y ocúpase d'intentar captar los científicos con mayor talentu fuera de les nuestres fronteres. La calidá de la investigación fecha na universidá recibió los avales de les alministraciones autonómica, estatal y europea.

Col envís de captar vocaciones ente los más nuevos, la universidá dispón d'una Unidá de Cultura Científica y Innovación que desenvuelve un ampliu programa de divulgación y cultura científica pa estudiantes d'enseñances preuniversitarias y públicu xeneral. Ente otres iniciatives, la UCC+i punxo en marcha y consolidó actividaes como la Selmana de la Ciencia y la Tecnoloxía, la Nueche Europea de los y les Investigadores, los Campus Científicos de Branu o De Xira cola Ciencia, onde s'imparten charres de divulgación científica en centros educativos, aules hospitalaries o asociaciones culturales.

Una institución comprometida col entornu

La Universidá d'Uviéu foi pionera n'España, a finales del sieglu XIX, en tirar les muries académiques pa facer llegar la formación y la cultura a toles clases sociales. Frutu d'esi esfuerzu ye l’área d'Estensión Universitaria y Proyección Cultural. La institución asturiana organiza cada añu más de 170 actividaes culturales qu'inclúin artes escéniques, conciertos, conferencies, concursos y premios, aules de docencia, esposiciones, xornaes, meses redondes o presentaciones de llibros. L'Edificiu Históricu del centru d'Uviéu, ye'l centru cultural por escelencia, anque non l'únicu, onde se desenvuelven los principales actos académicos y culturales abiertos a la sociedá. Los programes d'Estensión Universitaria despléguense per tola xeografía del Principáu d'Asturies, respondiendo siempre al compromisu de la institución académica col so entornu.

La universidá cunta amás con un programa específicu, non regláu, pa persones mayores que quieren siguir formándose. Más de 5000 estudiantes pasaron peles aules del Programa Universitariu pa Mayores de la Universidá d'Uviéu, más conocíu como PUMUO, solo nel últimu deceniu. Esta iniciativa empecipióse n'Uviéu, nel cursu 2001-2002, col propósitu, bien lligáu a la Estensión Universitaria, de favorecer la formación de persones mayores de 50 años que, en munches ocasiones y por circunstancies diverses, nun pudieron asistir a la universidá.  Dende la so creación nel cursu 2001-2002 impartieron docencia casi 400 profesores.

La iniciativa, qu'empezó n'Uviéu, foi sumando sedes y adaptando los sos conteníos a la demanda social. Asina, primeramente plantegáronse dos años de formación, que, yá en 2003, s’allargaron a tres años y, agora, a cinco. Los participantes en PUMUO pueden recibir clases, amás d'en la sede de la universidá n'Uviéu, n'Avilés, dende'l cursu 2004-2005; en Xixón, dende'l 2011-2012; en Mieres, dende'l 2018-2019, y en L.luarca, dende'l 2020/2021.

Colaboración público-privada en beneficiu de la sociedá

Forma parte del ADN de la Universidá d'Uviéu que lo que se fai dientro de les parees de la institución ruempa les muries académiques y suponga na práctica un beneficiu pa tola comunidá en términos de tresferencia de conocimientu, impulsu económicu, creación d'empléu de calidá y meyora de la competitividá nuna economía cada vez más glocal

Precisamente por eso la Universidá d'Uviéu trabaya sinérxicamente coles empreses y instituciones más destacaes de la rexón o del país. Frutu d'esti trabayu son les 35 cátedres qu'operen na universidá. Estes cátedres involucren grandes empreses como Arcelor-Mittal, Accenture, Merkel o Thyssenkrupp, pero tamién son cuestión d'interés pa la ecoloxía o la cultura, como les cátedres Smart Cities o Leonard Cohen.

La Universidá d'Uviéu ye una institución firmemente comprometida colos oxetivos y metes del Desarrollu Sostenible qu'establez l'Axenda 2030 de la Organización de les Naciones Xuníes.

Nel marcu de la responsabilidá social institucional, la universidá asturiana dispón amás de servicios pa l'atención y apoyu a les persones con necesidaes específiques y d’un espaciu solidariu onde desenvolver acciones de voluntariáu y cooperación internacional. Coles mesmes, la Unidá d'Igualdá vela pol cumplimientu de les polítiques d'igualdá de xéneru y de conciliación familiar.