El nuesu rodiu

La Universidá d’Uviéu ye la única institución pública d’educación superior nel Principáu d’Asturies, una comunidá de poco más d’un millón d’habitantes, con un paisax natural privilexáu, un bayurosu patrimoniu históricu y artísticu y perbones comunicaciones na fastera central de la comunidá, au s’asitien les principales ciudaes.

Esta comunidá allúgase nuna situación xeográfica afechisca pal desendolcu de la investigación y l'actividá empresarial, con modernes comunicaciones. Asturies tien un rodiu natural d'esceición. Cuasi un terciu del territoriu asturianu ta declaráu espaciu natural protexíu d'interés especial. Cinco fasteres tienen la distinción de la UNESCO de Reserva de la Biosfera: la Comarca Ozcos-Eo y les Tierres de Burón, el Parque Nacional de Los Picos d'Europa y los Parques Naturales de Penubina-La Mesa, Redes, Somiedu y Fontes del Narcea, Degaña ya Ibias. La calidá de les sos más de 200 sableres ye tamién una atraición induldable pa los turistes y pa los propios habitantes de la comunidá autónoma.

El so patrimoniu históricu y artísticu ye tamién una de les sos señes d'identidá, como los monumentos del Arte Asturianu, declaráu Patrimoniu de la Humanidá pola UNESCO. Tamién amerita esta distinción l'arte rupestre paleolíticu del Norte d'España, qu'inxer 5 cueves asturianes de gran sonadía internacional. Amás del patrimoniu históricu, la comunidá tien modernos equipamientos culturales.

Los Campus de la Universidá asítiense n'Uviéu, Xixón y Mieres. Uviéu, la capital y centru políticu y alministrativu de la comunidá, tien na arquiteutura, tanto histórica como contemporánea, ún de los sos elementos de más valir. Pela so parte, Xixón, la ciudá con mayor númberu d'habitantes d'Asturies, ye un llugar abiertu con unes sableres y faces verdes que-y dan un atractivu especial. Tamién Mieres cunta con un modernu campus universitariu. L'apueste de futuru d'esti llugar, de tradición minera, ta fondamente arreyáu a la investigación teunolóxica.