La Universidá

La Universidá d’Uviéu ye la única institución pública d’educación superior na comunidá autónoma d’Asturies. Ye una universidá con más de 400 años d’historia y un bayurosu patrimoniu históricu y cultural. Ufierta docencia en toles estayes de conocimientu, tanto en graos como en posgráu, amás d’enseñances billingües y másteres Erasmus Mundus como universidá coordinadora. Güei, la institución universitaria desendolca’l 80% de la I+D+i d’Asturies.

La Universidá d'Uviéu axunta'l llegáu de más de 400 años d'historia con una ufierta académica moderna y una investigación d'escelencia. Cunta con más de mediu centenar de graos adautaos al Espaciu Européu d'Educación Superior (EEES) y una ufierta de másteres universitarios de marcáu calter internacional y en collaboración con otres instituciones. Destaca la participación d'al rodiu de 200 empreses na docencia y práutiques de los másteres académico-profesionalizantes. Ye coordinadora de tres másteres Erasmus Mundus y ufierta a los alumnos estudios billingües, títulos dobles con universidaes estranxeres y dobles graos colos que los estudiantes algamen dos titulaciones.

La Universidá d'Uviéu cunta con siete campus nes principales ciudaes de la exa central d'Asturies, pero ufierta tamién cursos d'estensión universitaria y xeres culturales en dellos puntos de la comunidá.

La internacionalización ye una de les señes d'identidá de la universidá asturiana. Nos caberos años abrió nueves víes de collaboración n'Asia, con alcuerdos con universidaes de China y Xapón, y afondó nes rellaciones con Iberoamérica.

El Campus d'Escelencia Internacional afaló la movilidá del profesoráu n'universidaes asitiaes nos primeros puestos de los rankings internacionales y tamién l'acoyida de talentu. Nesti sen, financió estancies y conferencies de profesores estranxeros y ayudes a los estudiantes internacionales con meyores espedientes pa facer un máster universitariu. Nel ámbitu de la investigación, la Universidá d'Uviéu desendolca'l 80% de la I+D+i de la comunidá y cunta con al rodiu de mediu millar de contratos y convenios de collaboración con empreses.

Tamién ye una institución con un fondu compromisu social, que tien programes d'atención a les necesidaes específiques y afala aiciones qu'incentiven el voluntariáu, la cooperación internacional, arriendes de desendolcar polítiques actives d'igualdá de xéneru y conciliación familiar.